செம்மொழி மாநாட்டில் 5 "பைக்' மாயம்!

சரவணன் · சரவணன் Thu Jul 01, 2010 4:22 pm

கோவை : செம்மொழி மாநாட்டில் பல ஆயிரம் போலீசார் தீவிர கண்காணிப்பில் இருந்தும், 5 பேரின் இரு சக்கர வாகனங்கள் திருடப்பட்டுள்ளன.

கோவையில் ஜூன் 23ல் துவங்கி 27 வரை உலகத்தமிழ் செம்மொழி மாநாடு நடந்தது. தமிழர்களின் வாழ்க்கை முறை,கலை பண்பாட்டை விளக்கும் இனியவை நாற்பது அலங்கார வாகன அணிவகுப்பு, கவியரங்கம், பட்டிமன்றம், ஆய்வரங்கம்,
கலைப்பொருள் கண்காட்சி மற்றும் புத்தக கண்காட்சியை காண பல லட்சம் மக்கள் குடும்பத்தோடு கண்டு களித்தனர். மாநாட்டு வளாகத்திலும், சுற்று வட்டாரப் பகுதிகளிலும் பாதுகாப்புக்காக பல ஆயிரம் போலீசார் நிறுத்தப்பட்டு, தீவிர
கண்காணிப்பில் இருந்தனர். மாநாட்டுக்கு உள்ளூரில் இருந்து பல்லாயிரக்கணக்கான மக்கள், தங்களது இரு சக்கர வாகனங்களில் வந்தனர். இரு சக்கர வாகனம் நிறுத்த அவினாசி ரோடு, அரவிந்த் கண் மருத்துவமனை அருகிலும்,
மாநாடு வளாகத்திலும் பார்க்கிங் வசதி செய்யப்பட்டிருந்தது.

மாநாடு மற்றும் ஊர்வலப்பாதையில் ஆயிரக்கணக்கான போலீசார் பாதுகாப்பு பணியில் ஈடுபட்டிருந்தனர். இதேபோல் வாகன நிறுத்தும் இடத்திலும் நூற்றுக்கணக்கான போலீசார் பாதுகாப்பு பணியில் ஈடுபட்டிருந்தனர். தீவிர பாதுகாப்பு காரணமாக வாகனத்திருட்டு, பிக்பாக்கெட், நகை பறிப்பு உள்ளிட்ட குற்றங்கள் எதுவும் நடக்கவில்லை என போலீசார் தெரிவித்தனர். ஆனால், மாநாட்டுக்கு சென்றவர்களில் பலரது இரு சக்கர வாகனங்கள் திருட்டு போயுள்ள தகவல் தற்போது வெளியாகியுள்ளது.

கோவை பி.என். பாளையம் பொன்னிநகரைச் சேர்ந்த சரவண பாபு(32) என்பவரின் இரு சக்கர வாகனம், கடந்த 26ம் தேதியன்று மாநாடு வளாகத்தில் தொலைந்து போனது. வடவள்ளியைச் சேர்ந்த நாகராஜ்(51) என்பவரின் இரு சக்கர வாகனம்,
கடந்த 25ம் தேதியன்று காணாமல் போனது. இதே வளாகத்தில் ஜூன் 26ல், பீளமேடு நேதாஜி நகரைச் சேர்ந்த அர்த்தநாரீஸ்வரன்(33) என்பவரது பைக், மருதமலை ரோடு பின்.என். பாளையத்தைச் சேர்ந்த துரைராஜூக்கு சொந்தமான மொபட் ஆகியவையும் இந்த மாநாட்டுக் கூட்டத்தில் மாயமாகி விட்டன. கோவை ரேஸ்கோர்ஸ் பகுதியில்
வசிப்பவர் நல்லமுத்து(57) ; பொதுப்பணித்துறை அலுவலக உதவியாளர். கடந்த 27ல், தனது மொபட்டை அரவிந்த் கண் மருத்துவமனை வளாகத்தில் நிறுத்தி விட்டு மாநாடு சென்றார். திரும்பி வந்தபோது, மொபட் காணவில்லை. மாநாடு வளாகத்தில் திருட்டு போன பைக்குகளை பீளமேடு போலீசார் தேடி வருகின்றனர்.