என் குடும்பத்தினர் எல்லாம் சினிமா உலகைச் சேர்ந்தவர்கள்தான்: மு.க

ரபீக் · ரபீக் Sun Sep 19, 2010 1:13 pm

First topic message reminder :

மருமகன் படத்தயாரிப்பாளர், மகன் படத் தயாரிப்பாளர், பேரன் படத் தயாரிப்பாளர் என்றெல்லாம் சிலர் அரசியல் ரீதியாக கேலி பேசுகிறார்கள், கிண்டல் பேசுகிறார்கள். ஆமாம், என் குடும்பத்தினர் எல்லாம் சினிமா உலகைச் சேர்ந்தவர்கள்தான் என்றார் முதல்வர் கருணாநிதி.
ரஜினிகாந்த் நடித்து வெளிவந்த "முரட்டுக் காளை' அதே பெயரில் ரீமேக் ஆகிறது. இதை சூரியா புரொடக்ஷன்ஸ் சார்பில் இயக்குநர் அமிர்தத்தின் மகன் குணாநிதி தயாரிக்கிறார். படத்தின் சி.டி.யை சென்னையில் சனிக்கிழமை வெளியீட்டு முதல்வர் கருணாநிதி பேசியது:

பிரபலமான பல படங்கள் புதுப்பிக்கப்பட்டு வெளிவந்ததாக கவிஞர் வைரமுத்து சொன்ன பட்டியலில் "வள்ளித்திருமணம்', "அபூர்வ சகோதரர்கள்' உள்ளிட்ட படங்கள் உண்டு. ஆனால் "கண்ணகி' படம் மட்டும் வரவில்லை. அந்தப் படத்தின் வரலாறும், அது எப்படி மறு பதிப்பாக வெளிவந்தது என்பதும் ஏ.வி.எம்.சரவணனுக்கு தெரியும்.

ஆந்திரத்தைச் சேர்ந்த நடிகர் சுமன் இங்கு பேசும்போது நன்றாகத் தமிழ் பேசினார். அவர் பேசுகின்ற அளவுக்கு நம் தமிழ் நடிகர்கள் சிலர் பேசுவதில்லை என்ற வருத்தம் எனக்கிருக்கிறது.

மறைந்த ராமண்ணா எடுத்த படங்களில் இயக்குநர் அமிர்தம் கையாண்ட ஒளிப்பதிவு எல்லாம் எவ்வளவு திறமைமிக்கவை என்பது அவரது படங்களைப் பார்ப்பவர்களுக்குப் புரியும். அவரின் மகன் குணாநிதி தயாரித்துள்ள "முரட்டுக் காளை' படமும் பெரும் வெற்றியைப் பெறும்.
சில பேருக்கு கோபாலபுரமே சினிமா உலகமாக ஆகி விடுமோ என்று சொல்லத் தோன்றியுள்ளது. கோபாலபுரம் சினிமா உலகம்தான். சினிமா உலகத்தில் இருந்து வந்தவர்கள்தான் இன்றைக்கு கோபாலபுரத்திலிருந்து புகழ்க் கொடியை நாட்டிக் கொண்டிருக்கிறார்கள். நான் அதற்காக வெட்கப்படவில்லை.

மருமகன் படத்தயாரிப்பாளர், மகன் படத் தயாரிப்பாளர், பேரன் படத் தயாரிப்பாளர் என்றெல்லாம் சிலர் அரசியல் ரீதியாக கேலி பேசுகிறார்கள், கிண்டல் பேசுகிறார்கள். ஆமாம், என் குடும்பத்தினர் எல்லாம் சினிமா உலகைச் சேர்ந்தவர்கள்தான். இன்னும் சில காலத்துக்குப் பின் என்னுடைய கொள்ளுப் பேரன் கூட படத் தயாரிப்பாளராக வந்தால் அதிலே எந்தவித ஆச்சரியமும் தேவையில்லை. படத் தயாரிப்பு என்பது ஒன்றும் தவறான காரியம் இல்லை. படத் தயாரிப்பு என்பது ஏற்றுக் கொள்ளக் கூடிய ஒரு தொழில்தான்.

இன்றைக்குப் புற்றீசல் போல் பல படங்கள் வெளிவருகின்றன. ஒவ்வொரு நாளும் ஒன்றிரண்டு படங்கள் பூஜை போடப்படுகின்றன. சில பத்திரிகைகளில் முழுப் பக்கமும் சினிமா விளம்பரங்கள் வருகின்றன. இதெல்லாம் சினிமா தொழிலை வளர்க்கத்தான். சினிமா தொழிலாளர்களும் பாட்டாளிகள்தான். அவர்களையெல்லாம் வாழ வைக்க வேண்டும் என்ற எண்ணத்துடன் சினிமாத் துறையில் ஏற்கெனவே இருந்த கஷ்டங்களையெல்லாம் போக்கியிருக்கிறோம். தமிழில் தலைப்பு வைத்தால் வரி விலக்கு என்று அறிவித்திருப்பது தி.மு.க. ஆட்சியில்தான். அத்தகைய வரி இல்லாமல் இருப்பதால்தான் எல்லோரும் துணிந்து நம்பிக்கையோடு படங்கள் எடுக்கிறார்கள். அதனால்தான் திரைப்படத் துறையில் பெரிய வளர்ச்சி ஏற்பட்டிருக்கிறது என்றார்.

இவ்விழாவில் துணை முதல்வர் ஸ்டாலின், நடிகர்கள் விக்ரம், சுமன், தயாரிப்பாளர் சங்கத் தலைவர் இராம. நாராயணன், பெப்ஸி தலைவர் வி.சி.குகநாதன் உள்ளிட்ட பலர் கலந்து கொண்டார்கள்.
விடுப்பு குழுமம்