இந்திய அமைதிக்காகப் பிரார்த்தனை...

அன்புள்ள,ஈகரை உறவுகளே ,நண்பர்களே.,நட்பிகளே,தம்பிகளே தங்கைகளே ...


அகிம்சை
முறையில் சத்தியத்தின் வழி நின்று மகாத்மா நமக்குப் பெற்றுத்தந்த விடுதலை தேசத்தின் இன்றைய நிலை எங்கெங்கு காணிணும் போராட்டங்களும், அமைதியின்மையும்தான். துப்பாக்கிச் சத்தமும்தான். மாவோயிஸ்டுகள், தீவிரவாதிகள், விடுதலை உணர்வாளர்கள் என்று பல்வேறு பிரச்சனைகளில் சிக்கித் தவிக்கிறது நம் இந்தியத் திருநாடு. நம் தேசத்து வரலாறு, பிறநாட்டு மக்களுக்குச் சிறந்த பாடமாக அமையவேண்டும். அமைதியின் உதாரணமாக நம் தேசம் திகழ வேண்டும். ஆதிக்க வல்லூறுகளின் கொட்டம் ஒழிய வேண்டும். ஆதிக்க சக்திகளைக் கணக்கில் கொண்டால் அடங்கிக் கிடப்போரை விட பலமடங்குக் குறைவுதான். தனிமனித தைரியம் வளர வேண்டும். இதற்கான நமது பிரார்த்தனைகளே ஏறெடுப்போம்.

இந்நிலையில்
அறுபது ஆண்டுகால வழக்கொன்றின் தீர்ப்பு எதிர்வரும் வெள்ளிக்கிழமை வெளியாக உள்ளது. தீய சக்திகள் இத்தினத்தை எதிர்பார்த்துக் காத்திருக்கின்றன. வழக்கின் தீர்ப்பு யாருக்கு சாதகமாக அமைந்தாலும் சரி, பொதுச்சொத்துக்களைச் சேதப்படுத்துவதற்கும், அமைதிக்குப் பங்கம் விளைவிப்பதற்கும் காத்துக் கிடக்கும் பொல்லாதவர்களிடமிருந்து தேசத்தைக் காக்கும் பொறுப்பு நம்மிடை மட்டுமே உள்ளது. நடவடிக்கைகள் எடுக்கத் தயாராக வேண்டிய நடுவன் அரசோ எத்தீர்ப்பானாலும் சரி அதை இறுதி முடிவு என்றெண்ணிக் கொள்ள வேண்டாமென்று சப்பை கட்டுகிறது. ரயில்களை மறிப்பதும், பேருந்துகளைக் கொழுத்துவதும், கடைகளை அடித்து நொறுக்குவதும், கிடைக்கும் இடத்தில் கொள்ளை அடிப்பதும்தான் இந்த தீய சக்திகளின் நோக்கமேயன்றி, பாபருக்கு மசூதி கட்டுவதோ, அல்லது இராமனுக்குக் கோயில் கட்டுவதோ அல்ல.. இந்த தீய சக்திகளின் முனைப்பை முறியடிக்க வேண்டியது நமது கரங்கள்தான்.

நம்
கரங்களை இறைவன் முன் குவிப்போம். மன்றாடிக் கேட்போம். இந்தியத் திருநாட்டிற்கு அமைதியைத் தாரும் இறைவா என்று மன்றாடுவோம். நாம் அனைவரும் சேர்ந்து ஒரு கூட்டுப் பிரார்த்தனைக்கு ஏற்பாடு செய்வோம். பெரியோர்களே.. நாள் குறித்துத் தாருங்கள்.

நம்
இதயங்கள் ஒரே சமயத்தில் ஒன்றிணைந்து கேட்கும்போது நாம் கேட்பவற்றை மறுக்கும் அதிகாரம் அந்த இறைவனுக்கும் இல்லை. நமக்குத் தேவையானவற்றை அவர் தந்தே ஆகவேண்டும் என்ற உறுதியோடு மன்றாடுவோம்.

கூடுமான
வரையில் நம் கண்ணெதிரே நடைபெறும் அத்து மீறல்களைத் தடுக்க முயல்வோம்.

இதைப்பற்றிய
நண்பர்களின் கருத்துக்களை இவ்விடம் தெரிவியுங்கள்..

அமைதி
காப்போம்.. தேசத்தைக் காப்போம். ஏனெனில் இது நமது தேசம்..

இறைவனிடம் வேண்டுவோம்.கூட்டுப் பிராத்தனை கைக்கூடும்.
அனைவரையும் காக்க இறைவனே துணை .