எகிப்து அதிபர் பதவி விலக இறுதி கட்ட `கெடு' முடிந்தது ராஜினாமா செய்ய அதிபர் தொடர்ந்து மறுப்பு

லட்சக்கணக்கான பேர் பேரணியாக திரண்டனர்: எகிப்து அதிபர் பதவி விலக இறுதி கட்ட `கெடு' முடிந்தது ராஜினாமா செய்ய அதிபர் தொடர்ந்து மறுப்பு


கெய்ரோ, பிப்.5-

எகிப்தில், அதிபர் பதவியில் இருந்து விலக இறுதிகட்ட கெடு நேற்று முடிவடைந்தது. அதிபர் பதவி விலக கோரி நேற்று நடந்த பேரணியில், லட்சக்கணக்கான மக்கள் கலந்து கொண்டனர். என்றாலும் பதவி விலக அதிபர் தொடர்ந்து மறுத்து வருகிறார்.

எகிப்தில் போராட்டம்

எகிப்து நாட்டின் அதிபராக 82 வயதான ஹோசினி முபாரக் கடந்த 30 ஆண்டுகளாக பதவியில் இருந்து வருகிறார். இவருக்கு கடுமையான எதிர்ப்பு உருவாகி இருக்கிறது. அவர் பதவி விலக வேண்டும் என்று கோரி, எதிர்ப்பாளர்கள் கடந்த 11 நாட்களாக போராட்டம் நடத்தி வருகிறார்கள். போராட்டத்துக்கு தலைமைதாங்கி நடத்தி வரும் நோபல் பரிசு பெற்ற மொகமது எல்பராடி, `அதிபர் முபாரக் உடனே பதவி விலகி தீர வேண்டும். தேசிய கூட்டு மந்திரிசபை அமைக்க வேண்டும்' என்பதில் உறுதியாக இருக்கிறார்.

இந்த போராட்டத்தில் இதுவரை 156 பேர் உயிர் இழந்து இருக்கிறார்கள். 800-க்கும் மேற்பட்டவர்கள் காயம் அடைந்து இருக்கிறார்கள். அதிபர் பதவி விலக நேற்று வரை எதிர்ப்பாளர்கள் கெடு விதித்து இருந்தனர். நேற்று இறுதி கட்ட போராட்டமாக, கெய்ரோ நகரில் உள்ள பிரசித்தி பெற்ற தக்ரிர் சதுக்கத்தில் லட்சக்கணக்கான மக்கள் கூடினார்கள். அவர்கள் அதிபருக்கு எதிராக கோஷமிட்டனர்.

சாதாரண உடையில் போலீசார்

எகிப்தின் துணை பிரதமரும், ராணுவ மந்திரியுமான ஹூசேன் தந்தவி, தக்ரிர் சதுக்கத்துக்கு சென்று பாதுகாப்பு ஏற்பாடுகளை கவனித்தார். அவர், போராட்டக்காரர்களை ராணுவத்தினர் விரட்டி அடிக்கும் பணியை முடுக்கி விட்டார்.

அப்போது ஆட்சிக்கு ஆதரவானவர்கள் அங்கு வந்து போராட்டக்காரர்களை விரட்டினார்கள். இதுபற்றி போராட்டக்காரர்கள் கூறுகையில், `ராணுவத்திலும் போலீசிலும் அதிபருக்கு ஆதரவானவர்கள், சாதாரண உடையில் வந்து எங்கள் மீது தாக்குதல் நடத்தினார்கள்' என்று குற்றம் சாட்டினார்கள்.

இந்த நிலையில் அதிபர் முபாரக், டெலிவிஷன் சேனல் ஒன்றுக்கு பேட்டி அளித்தார். அப்போது அவர் கூறியதாவது:-

பெரும் குழப்பம் ஏற்படும்

நான் எகிப்தில் 62 ஆண்டுகள் அரசியல் வாழ்க்கையை சாதித்து விட்டேன். இப்போது நாட்டில் இருக்கும் அரசியல் சூழ்நிலை காரணமாக நான் உடனே பதவி விலக மாட்டேன். செப்டம்பர் மாதம் பதவியில் இருந்து விலகி விடுவேன். இப்போது நான் பதவி விலகினால், நாட்டில் பெரிய குழப்பம் ஏற்பட்டு விடும்.

எதிர்ப்பாளர்களுக்காக நான் கவலைப்பட வில்லை. இந்த நாட்டுக்காக மட்டுமே கவலைப்படுகிறேன். எகிப்து நாட்டில் முஸ்லிம் சகோதரர்களுக்குள் மோதிக்கொள்வதை நான் விரும்ப வில்லை. இந்த நாட்டில் இருந்து ஓடி விட மாட்டேன். இந்த மண்ணில்தான் உயிர் விடுவேன்.

ஒபாமாவுடன் டெலிபோன் பேச்சு

அமெரிக்க ஜனாதிபதி பராக் ஒபாமா என்னுடன் டெலிபோனில் பேசினார். உடனே பதவி விலகும்படி அறிவுறுத்தினார்.

அவருக்கு இந்த நாட்டின் நிலை தெரிய வில்லை. நான் இப்போது பதவி விலகினால் உடனே எனக்கு என்ன நடக்கும் என்பதே தெரியாது.

இவ்வாறு முபாரக் கூறினார்.

எகிப்தின் பிரதமர் அகமது சபிக் கூறுகையில், `அமெரிக்கா எங்களுக்கு கட்டளையிட முடியாது., செப்டம்பர் மாதம் ஜனாதிபதி தேர்தல் நடக்கிறது. அப்போது கவுரவமாக பொறுப்பில் இருந்து முபாரக் விலகிக்கொள்ள அனைவரும் அனுமதிக்க வேண்டும்' என்றார்.

தினதந்தி