டீ கடை பெஞ்சு

eegaraiviswa · eegaraiviswa Sat Mar 05, 2011 1:22 pm

ஸ்கார்ப்பியோ காரில் பிடிபட்ட ஒன்றரை கோடி ரூபாய்...! ""முதல்வர் கோபமாயிட்டாரு பா...!'' என்று விவாதத்தை ஆரம்பித்தார் அன்வர்பாய்.

""என்ன காரணம்ங்க...'' எனக் கேட்டார் அந்தோணிசாமி.

""தலைமைச் செயலகம் பக்கத்துல, சமீபத்துல போராட்டம் நடத்திய அரசு ஊழியர்கள் மேல போலீசார் தடியடி நடத்தினாங்க பா... இந்த விவகாரம் தொடர்பா, முதல்வரைச் சந்திக்க
நிர்வாகிகள் போயிருக்காங்க...

""அவங்ககிட்ட பாதுகாப்பு அதிகாரிகள் பேசறப்ப, "முதல்வரிடம் மெதுவாகவோ, சத்தமாகவோ பேசிடாதீங்க... அவர் கோபப்படற மாதிரி இருந்தா, "மன்னிச்சிருங்க அய்யா'ன்னு உடனே சொல்லணும்'னு சொல்லி அனுப்பிருக்காங்க... இதைக் கேட்ட நிர்வாகிகள் அதிர்ச்சியாகிட்டாங்க...'' என்றார் அன்வர்பாய்.

""அப்பறம் என்ன ஆச்சுங்க...'' என, ஆர்வமாக கேட்டார் அந்தோணிசாமி.

""முதல்வர்ட்ட பேசறப்ப, "எங்க சங்கத்துக்கு இதுவரை அங்கீகாரம் கொடுக்கலை'ன்னு கேட்டிருக்காங்க... உடனே, "அங்கீகாரம் கொடுப்பது போல நடந்துக்குங்க'ன்னு பதில் வந்திருக்கு... "உங்களை பார்க்க கடிதம் போட்டோம்... அழைப்பு வரலை'ன்னு நிர்வாகிகள் சொல்லியிருக்காங்க...

""நான் இங்க தானே இருக்கேன்... இந்த பரதேசியை இங்க வந்து பார்க்க வேண்டியது தானே'ன்னு முதல்வர் கோபமாயிட்டாராம் பா... வேறு ஏதோ கோரிக்கையை சொல்ல, "நான் என்ன ஜெயலலிதாவா'ன்னு முதல்வர் கேட்டாராம்... உடனே, பாதுகாப்பு அதிகாரிகள், நிர்வாகிகளை வெளியேத்திட்டாங்க பா...'' என்றார் அன்வர்பாய்.

""ஸ்கார்ப்பியோ காரில் ஒன்றரை கோடி ரூபாய் பிடிச்சிருக்கா ஓய்...'' என, அடுத்த மேட்டரில் நுழைந்தார் குப்பண்ணா.

""தேர்தல் பட்டுவாடாவுக்கு போன பணமா வே...'' எனக் கேட்டார் பெரியசாமி அண்ணாச்சி.

""கரெக்டா பிடிச்சிட்டீரே ஓய்... சென்னை - திருச்சி சாலையில் காரில் பெரிய தொகையோடு, ஒரு கும்பல் போறதா விழுப்புரம் போலீசாருக்கு தகவல் வந்திருக்கு... உடனே, வாகனத் தணிக்கையை தீவிரப்படுத்தி இருக்கா... இதில், ஓங்கூர் டோல்கேட் அருகே ஸ்கார்ப்பியோ கார் ஒண்ணு சிக்கியிருக்கு... காரைச் சோதனை போட்டப்ப, அதில் ஒரு கோடியே 50 லட்சம் ரூபாய் இருந்திருக்கு...'' என்றார் குப்பண்ணா.

""பணம் பிடிபட்டதா சேதி ஏதும் வரலையே வே...'' எனக் கேட்டார் அண்ணாச்சி.

""காரில் வந்தவங்கட்ட விசாரிச்சப்ப, சிதம்பரத்தைச் சேர்ந்த ஆளுங்கட்சி கூட்டணி பிரமுகருக்கு வேண்டியவான்னு தெரியவந்திருக்கு... மேலிட உத்தரவுப்படி, உடனே, "சல்யூட்' போட்டு காரை அனுப்பி வைச்சுட்டா... பின் எப்படி சேதி வரும் ஓய்...'' என்றார் குப்பண்ணா.

""இன்னாள் மந்திரியும், முன்னாள் மந்திரியும் ஒரு தொகுதிக்கு குறி வைச்சிருக்காங்க...'' என, கடைசி மேட்டரில் நுழைந்தார் அந்தோணிசாமி.

""எந்த தொகுதிக்கு பா...'' எனக் கேட்டார் அன்வர்பாய்.

""ஆதிதிராவிடர் நலத்துறை அமைச்சர் தமிழரசியின் சமயநல்லூர் தொகுதி நீக்கப்பட்டிருக்குங்க... அதனால, அவர் மானாமதுரை தொகுதி மேல கண் வைச்சிருக்காருங்க... இதே தொகுதியில் சொந்த ஊர் இருக்கறதால, "மாஜி' மந்திரி சமயநல்லூர் செல்வராஜும் சீட் பிடிக்க முயற்சி பண்றாருங்க... இந்த போட்டியில யார் ஜெயிக்கப் போறாங்கன்னு எதிர்பார்ப்பு எழுந்திருக்குங்க...'' என்று சொல்லி முடித்து எழுந்தார் அந்தோணிசாமி; பெஞ்ச் அமைதியானது.