தந்தையை குடிகாரர், சூதாடி என்ற மகன்களுக்கு ரூ.2 லட்சம் அபராதம்

புதுடெல்லி : தந்தையை குடிகாரர், சூதாடி, பல பெண்களுடன் தொடர்பு உள்ளவர் என்று அவமதித்த மகன்களுக்கு டெல்லி நீதிமன்றம் ஸி2 லட்சம் அபராதம் விதித்து அதிரடி தீர்ப்பு கூறியுள்ளது. டெல்லியை சேர்ந்தவர் குல்தீப் சிங். இவருடைய மகன்கள் ஹரிந்தர் சிங், ஜதிந்தர் சிங். தந்தைக்கும், மகன்களுக்கும் இடையே ஏற்பட்ட சொத்து தகராறு 2004ம் ஆண்டு நீதிமன்ற படிக்கட்டில் ஏறியது. சொத்து வழக்கில் தாக்கல் செய்த ஒரு மனுவில், தங்கள் தந்தையை சூதாடி, மொடா குடிகாரர், பல பெண்களுடன் கள்ளத் தொடர்பு வைத்துள்ளவர் என்று மகன்கள் இருவரும் குற்றம் சாட்டினர்.

இதனால், மனம் நொந்த தந்தை குல்தீப் சிங் மனநஷ்டஈடு வழக்கு தொடர்ந்தார். அதில், ‘எனக்கு எந்த கெட்ட பழக்கமும் கிடையாது. எனது நற்பெயருக்கு என் மகன்கள் களங்கம் ஏற்படுத்தி விட்டனர். அபாண்ட பழி சுமத்தியதற்காக எனக்கு அவர்கள் ரூ.10 லட்சம் நஷ்டஈடு வழங்க வேண்டும்‘ என்று கூறியிருந்தார். வழக்கு விசாரணையின் போது, ‘நாங்கள் சொன்னது உண்மைதான்‘ என்று மகன்கள் வாதிட்டனர். இருதரப்பு வாதங்களை கேட்ட பிறகு கூடுதல் நீதிபதி சுரீந்தர் ரதி அளித்த தீர்ப்பு:

தங்கள் தந்தையை பற்றி ஹரீந்தர் சிங்கும், ஜதிந்தர் சிங்கும் கூறிய குற்றச்சாட்டை நிரூபிக்க, எந்த ஆதாரத்தையும் சமர்பிக்கவில்லை. இந்த வழக்கு உணர்வுப்பூர்வமான ஒன்று. தங்களுடைய சொந்த தந்தையை மகன்கள் அவமதித்து இருக்கின்றனர். சொத்து தொடர்பான வழக்கில் தந்தையை விமர்சிக்க அவசியமே இல்லாதபோது, அவரை அவமதிக்க இதை ஒரு வாய்ப்பாக பயன்படுத்தி உள்ளனர். எனவே, அவரை அவமதித்த மகன்கள் இருவரும் குல்தீப் சிங்குக்கு தலா ரூ.1 லட்சத்தை நஷ்டஈடாக வழங்க வேண்டும். இவ்வாறு தீர்ப்பில் நீதிபதி கூறியுள்ளார்.