திகார் சிறையில் புதிய "வெயிட்டிங் ரூம்' தயார்

First topic message reminder :

புதுடில்லி: திகார் சிறையில் அடைக்கப்பட்டுள்ள கைதிகளை சந்திக்க வரும் உறவினர்கள், உட்காருவதற்காக, புதிதாக,"வெயிட்டிங் ரூம்' அமைக்கப்பட்டுள்ளது.
திகார் சிறையில் அடைக்கப்பட்டுள்ள கைதிகளை சந்திப்பதற்காகவும், விடுதலை செய்யப்படும் கைதிகளை அழைத்துச் செல்வதற்காகவும் தினசரி நூற்றுக்கணக்கான உறவினர்கள், சிறை வளாகத்திற்கு வருகின்றனர். அவர்கள், சிறைச்சாலைக்கு வெளியே காத்திருப்பதால், அந்த சாலையில், மாலை நேரங்களில், பெரும் போக்குவரத்து நெரிசல் ஏற்படுகிறது. மேலும், விடுதலையாகும் கைதிகளை அழைத்துச் செல்ல, வெளியூர்களில் இருந்து வரும் உறவினர்கள், சிறைச்சாலை நடைமுறைகள் முடியும் வரை, சில நாட்கள் அங்கேயே வெளியில் தங்க நேரிடுகிறது. எனவே, இவற்றை தவிர்ப்பதற்காக, திகார் சிறையில் மக்கள் தொடர்பாளர் அலுவலகம் அமைந்துள்ள வளாகத்தில், விமான நிலையங்களில் உள்ளது போன்று மிகப் பெரிய, 'வெயிட்டிங் அறை' உருவாக்கப்பட்டுள்ளது. 300 பேர் அமரக்கூடிய அளவுக்கு இருக்கை வசதிகள் செய்யப்பட்டுள்ளன. மேலும், கண்காணிப்பு கேமராக்கள், அறிவிப்புகளை வெளியிட ஸ்பீக்கர் சிஸ்டம், தகவல் பலகை, சிறை தொடர்பான தகவல்களை பெறுவதற்கான வசதி உள்ளிட்டவை அதில் செய்யப்பட்டுள்ளன. மேலும் டீ, காபி, தின்பண்டங்கள் உள்ளிட்டவற்றை வாங்கிக் கொள்வதற்கும், சிறிய அளவிலான, "கேன்டீன்' வசதி செய்யப்பட்டுள்ளது.
காத்திருப்பவர்கள் படிப்பதற்காக செய்தித்தாள்கள், பத்திரிகைகள், இலவசமாகவே வழங்கப்படும். கதவு எண் 3 மற்றும் 4 அருகில், நிரந்தரமாக ஒரு அதிகாரி இருப்பார். அவரிடம், ஜெயில் நடைமுறைகள் தொடர்பாகவும், கைதிகளை விடுதலை அல்லது ஜாமினில் வெளிவருவதில் தாமதம் ஏற்படுவது உள்ளிட்ட சந்தேகங்களையும், கேட்டு தெரிந்து கொள்ளலாம். வெயிட்டிங் அறையில், ஆயுதம் தாங்கிய போலீசார் பாதுகாப்புக்கு நிறுத்தப்பட்டிருப்பர். மேலும், கண்காணிப்பு கேமராக்கள் மூலம், அந்த அறை கண்காணிக்கப்படும்.