ஆஸி., அசத்தல் வெற்றி

இங்கிலாந்துக்கு எதிரான ஆறாவது ஒருநாள் போட்டியில் ஆஸ்திரேலிய அணி 111 ரன்கள் வித்தியாசத்தில் வெற்றி பெற்றது. இதன் மூலம் ஒருநாள் போட்டிக்கான ரேங்கிங் (தரவரிசை) பட்டியலில் ஆஸ்திரேலியா மீண்டும் "நம்பர்-1' இடத்துக்கு முன்னேறியது.
இங்கிலாந்து சென்றுள்ள ஆஸ்திரேலிய அணி ஏழு போட்டிகள் கொண்ட ஒருநாள் தொடரில் பங்கேற்கிறது. முதல் ஐந்து போட்டியில் வெற்றி கண்ட ஆஸ்திரேலியா 5-0 என தொடரில் முன்னிலை வகித்தது. ஆறாவது போட்டி நாட்டிங்ஹாமில் நடந்தது. "டாஸ்' வென்ற ஆஸ்திரேலிய கேப்டன் ரிக்கி பாண்டிங், பேட்டிங் தேர்வு செய்தார்.
பெய்னே சதம்:
ஆஸ்திரேலிய அணிக்கு வாட்சன் (4),கேப்டன் பாண்டிங் (6) ஏமாற்றம் அளித்தனர். பின்னர் டிம் பெய்னே, மைக்கேல் ஹசி ஜோடி இங்கிலாந்து பந்துவீச்சை பதம்பார்த்தது. இந்த ஜோடி 3வது விக்கெட்டுக்கு 163 ரன்கள் சேர்த்தபோது ஹசி (65) அவுட்டானார். மறுமுனையில் அபாரமாக ஆடிய பெய்னே, ஒருநாள் அரங்கில் தனது முதல் சதம் கடந்தார். இவர் 111 ரன்கள் எடுத்து வெளியேறினார். பின்னர் வந்த காமிரான் ஒயிட் (35), ஹோப்ஸ் (38) ஓரளவு ரன்கள் சேர்த்தனர். ஆஸ்திரேலிய அணி 50 ஓவரில் 8 விக்கெட் இழப்புக்கு 296 ரன்கள் குவித்தது.
பிரஸ்னன் ஆறுதல்:
சவாலான இலக்கை விரட்டிய இங்கிலாந்து அணிக்கு கேப்டன் ஸ்டிராஸ் (0), டென்லே (25), ரவி போபரா (24), பிரையர் (6) உள்ளிட்ட "டாப்-ஆர்டர்' பேட்ஸ்மேன்கள் ஏமாற்றினர். அடுத்து வந்த ஓவைஸ் ஷா (23), மார்கன் (23), பிரஸ்னன் (31*) ஆகியோரும் தாக்குப்பிடிக்கவில்லை. இறுதியில் இங்கிலாந்து அணி 41 ஓவரில் 185 ரன்களுக்கு ஆல் அவுட்டாகி, தோல்வியடைந்தது.
சதம் கடந்த பெய்னே ஆட்டநாயகனாக தேர்வு செய்யப்பட்டார்.
--------------------
மீண்டும் "நம்பர்-1'
இங்கிலாந்து அணிக்கு எதிராக தொடர்ந்து ஆறாவது வெற்றியை பதிவு செய்த ஆஸ்திரேலிய அணி, ரேங்கிங் பட்டியலில் 127 புள்ளிகளுடன் மீண்டும் முதலிடத்தை பிடித்துள்ளது. தென் ஆப்ரிக்கா (127 புள்ளி), இந்தியா (126 புள்ளி) அணிகள் முறையே 2வது மற்றும் 3வது இடத்துக்கு தள்ளப்பட்டன.
வரும் 20ம் தேதி நடக்கும் ஏழாவது மற்றும் கடைசி ஒருநாள் போட்டியிலும் ஆஸ்திரேலிய அணி வெற்றி பெற வேண்டும். அப்போது தான் முதல் இடத்தை தக்க வைத்துக் கொள்ள முடியும். ஒருவேளை தோல்வியடைந்தால், மீண்டும் 3வது இடத்துக்கு தள்ளப்படும்.