ராஜிவ் கொலையாளிகளை தூக்கிலிட கோரி உண்ணாவிரதம் இருந்தபோது காங்கிரசார் மீது செருப்பு வீச்சு

திருச்சி : ராஜிவ் காந்தி கொலையாளிகள் 3 பேரை தூக்கிலிடக்கோரி திருச்சியில் நேற்று உண்ணாவிரதம் இருந்த காங்கிரசார் மீது செருப்பு, கல் வீசப்பட்டது. இது தொடர்பாக 80 பேர் கைது செய்யப்பட்டனர். ராஜிவ் கொலை வழக்கில் தூக்கு தண்டனை பெற்றுள்ள முருகன், சாந்தன், பேரறிவாளன் ஆகியோரை உடனே தூக்கிலிடக்கோரி திருச்சி சிந்தாமணி அண்ணா சிலை அருகில் காங்கிரஸ் சார்பில் உண்ணாவிரதப் போராட்டம் நடத்த கடந்த 10 தினங்களுக்கு முன்பே போலீசில் அனுமதி பெறப்பட்டது.

இந்நிலையில் நேற்றுமுன் தினம் விடுதலை சிறுத்தைகள், புதிய தமிழகம், நாம் தமிழர் இயக்கம், பெரியார் திராவிட கழகத்தினர் கோட்டை போலீஸ் உதவி கமிஷனர் அலுவலகத்தை முற்றுகையிட்டு காங்கிரஸ் போராட்டத்திற்கு அனுமதி வழங்கியதற்கு எதிர்ப்பு தெரிவித்து கோஷம் எழுப்பினர். அவர்களை போலீசார் சமாதானம் செய்தனர்.
இந்நிலையில் நேற்று காலை 10.30 மணிக்கு காங்கிரசாரின் உண்ணாவிரத போராட்டம் துவங்கியது. போராட்டத்திற்கு திருச்சி மாநகர் மாவட்ட தலைவர் ஜெரோம் ஆரோக்கியராஜ் தலைமை வகித்தார். போராட்டத்தில் சுமார் 500 பேர் கலந்து கொண்டனர்.

அப்போது உண்ணாவிரத போராட்டத்திற்கு எதிர்ப்பு தெரிவித்து ஆர்ப்பாட்டம் நடத்த விடுதலை சிறுத்கைள் உள்ளிட்ட கட்சியினர் சத்திரம் பஸ் நிலையம் அருகே கூடினர். தகவலறிந்த கோட்டை போலீசார் விரைந்து வந்து விடுதலை சிறுத்தைகள் மாவட்ட செயலாளர் அரசு, புதிய தமிழகம் மாவட்ட செயலாளர்கள் சங்கர், அய்யப்பன், நாம் தமிழர் இயக்கத்தினர் உள்பட சுமார் 80 பேரை போலீசார் கைது செய்தனர்.

இவர்களை ஏற்றிக்கொண்டு 2 பஸ் உண்ணாவிரத பந்தலை கடந்தது. அப்போது 2வது பஸ்சில் இருந்த சிலர் உண்ணாவிரதப் பந்தலை நோக்கி செருப்பு, கற்களை வீசினர். ஆத்திரமடைந்த காங்கிரசார் ஓடி சென்று அண்ணா சிலை அருகே 2 பஸ்களையும் மறித்து சராமாரியாக கல், செருப்பு, சேர் போன்றவற்றால் தாக்கினர். இதில் பஸ் கண்ணாடி உடைந்தது. பஸ் உள்ளே உட்கார்ந்திருந்த சங்கர், குமார் ஆகியோருக்கு காயம் ஏற்பட்டது.

இதையடுத்து போலீசார் காங்கிரசாரை சமாதானம் செய்து போக்குவரத்தை சீர் செய்தனர். இதன் பிறகு கைது செய்யப்பட்டவர்களை என்எஸ்பி திருமண மண்டபத்தில் அடைத்தனர். அங்கு அவர்கள் சாப்பிட மறுத்து தாக்குதல் தொடர்பாக ஆர்டிஓ விசாரணை நடத்த வேண்டும் என்று கோரிக்கை விடுத்தனர். இதனால் அங்கு பரபரப்பு நிலவியது.

தினகரன்