புதுடில்லி: தெற்காசிய கால்பந்து போட்டியில் இந்திய அணியால், பலம் குன்றிய ஆப்கானிஸ்தானை சமாளிக்க முடியவில்லை. போட்டி 1-1 என்ற கோல் கணக்கில் "டிரா ஆனது.
டில்லியில் தெற்காசிய கால்பந்து சாம்பியன்ஷிப் தொடர் நடக்கிறது. நேற்று நடந்த துவக்க போட்டியில் உலக ரேங்கிங் பட்டியலில் 162வது இடத்தில் உள்ள இந்திய அணி, ஆப்கானிஸ்தானை(178வது இடம்) சந்தித்தது. இதில், இந்திய அணி எளிதாக வெற்றி பெறும் என எதிர்பார்க்கப்பட்டது. ஆனால் போட்டி துவங்கிய நான்காவது நிமிடத்தில் ஆப்கானிஸ்தானின் பலால் அரேசோ முதல் கோல் அடித்து அதிர்ச்சி தந்தார். இதற்கு இந்திய அணியின் சுனில் செத்ரி 10வது நிமிடத்தில் பதிலடி கொடுத்தார். பின் அரேசோ, சஞ்சர் அகமது ஆகிய ஆப்கன் முன்கள வீரர்கள், இந்திய அணிக்கு தொடர்ந்து நெருக்கடி கொடுத்தனர். மறுபக்கம் இந்திய வீரர்களின் செயல்பாடு மிகவும் மந்தமாக இருந்தது. குறிப்பாக மிராண்டா பல வாய்ப்புகளை வீணடித்தார். தவிர, இந்திய அணியிடம் "பினிஷிங் திறனும் காணப்படவில்லை. இதனால் முதல் பாதியில் கூடுதலாக கோல் அடிக்க முடியவில்லை.



இரண்டாவது பாதி துவங்கிய 10வது நிமிடத்தில் இந்திய அணிக்கு கோல் அடிக்க பொன்னான வாய்ப்பு கிடைத்தது. ஆனால், சுனில் செத்ரி ஏனோதானோ என பந்தை அடிக்க, வாய்ப்பு நழுவியது. பின் ஆப்கன் வீரர் மகோதார் பைசுல்லா தனது கையால் பந்தை தொட்டதாக கூறி இந்திய அணியினர் "பெனால்டி கேட்டு வாதாடினர். இதனை ஏற்க மலேசிய நடுவர் நகோர் அமிர் மறுத்து விட்டார். கடைசி கட்டத்தில் ஆப்கன் வீரர் சஞ்சய் அகமதி கோல் அடிக்க வாய்ப்பு இருந்தது. இதனை கோல்கீப்பர் கரன்ஜித் துடிப்பாக தடுத்ததால், இந்திய அணி பெரும் சிக்கலில் இருந்து தப்பியது. இறுதியில் போட்டி 1-1 என்ற கோல் கணக்கில் "டிராவில் முடிந்தது.


-----
பயிற்சியாளர் புகார்
இந்திய அணியின் பயிற்சியாளர் சேவியோ மெதியரா கூறுகையில்,""ஆப்கானிஸ்தானை குறைத்து மதிப்பிடக் கூடாது. இந்த அணியின் பல வீரர்கள் ஜெர்மனியின் பண்டஸ்லிகா கிளப்புக்காக விளையாடிய அனுபவம் வாய்ந்தவர்கள். "பெனால்டி ஏரியாவில் வைத்து ஆப்கானிஸ்தான் வீரர் பைசுல்லா, பந்தை கையால் தொட்டார். இதற்கு "பெனால்டி தர நடுவர் மறுத்தது வியப்பாக இருந்தது. இது இந்தியாவுக்கு பாதிப்பாக அமைந்தது, என்றார்.