4வது டெஸ்ட்: பவுலிங்கைப் போலவே பேட்டிங்கிலும் இந்தியா சொதப்பல்-2 விக்கெட் அவுட்

அடிலெய்ட்: ஆஸ்திரேலியாவுக்கு எதிரான 4வது மற்றும் கடைசி டெஸ்ட் போட்டியின் 2ம் நாள் ஆட்ட முடிவில் இந்தியா 2 விக்கெட்களை இழந்து 61 ரன்களை எடுத்திருந்தது. முன்னதாக ஆஸ்திரேலியா தனது முதல் இன்னிங்சில் 604 ரன்களைக் குவித்து டிக்ளேர் செய்திருந்தது.

இந்தியா, ஆஸ்திரேலியா அணிகளுக்கு எதிரான 4வது டெஸ்ட் போட்டி நேற்று அடிலெய்டில் தொடங்கியது. 'டாஸ்' வென்ற ஆஸ்திரேலியா துவக்க 3 விக்கெட்களை வரிசையாக பறிக் கொடுத்தது. துவக்க ஆட்டக்காரர் டேவிட் வார்னர்(8), ஷான் மார்ஷ்(3), கோவன்(30) உள்ளிட்டோர் வேகமாக பிரிவிலியன் திரும்பினர்.

அதன்பிறகு வந்த ரிக்கி பான்டிங், கேப்டன் கிளார்க் ஜோடி நிலைத்து நின்று நிதானமாக ஆடினர். முதல்நாள் முடிவில் ஆஸ்திரேலியா 3 விக்கெட்களை இழந்து 335 ரன்களை எடுத்திருந்தது. ரிக்கி பான்டிங் (137), கேப்டன் கிளார்க்(140) ஆகியோர் களத்தில் அவுட்டாகாமல் இருந்தனர்.

இன்று 2வது நாள் ஆட்டத்தை தொடர்ந்த பான்டிங், கிளார்க் ஜோடி அபாரமாக ஆடி, இந்திய பந்துவீச்சாளர்களை கதிகலங்க வைத்தது. இரட்டை சதம் கடந்து ஆடி வந்த கேப்டன் மைக்கேல் கிளார்க் (210) உமேஷ் யாதவ் பந்தில் போல்டானார். அதன்பிறகு வந்த மைக்கேல் ஹஸ்ஸி (25) எதிர்பாராத முறையில் ரன் அவுட்டானார்.

பான்டிங், கிளார்க் ஜோடி அடிலெய்ட் ஆடுகளத்தில் 4வது விக்கெட்டுக்கு அதிகபட்ச 'பார்ட்னர்ஷிப்'பாக 386 ரன்கள் என்ற புதிய சாதனையை படைத்தது.

ஆஸ்திரேலியாவின் விக்கெட்கள் சரிந்தாலும் ரன் வேகம் மட்டும் குறையாமல் இருந்தது. தொடர்ந்து விறுவிறுப்பாக ஆடிவந்த பான்டிங் இரட்டை சதம் கடந்து, 221 ரன்களுக்கு ஜாகிர்கானின் வேகத்தில் வெளியேறினார். பீட்டர் சிடில் 2 ரன்களில் ஏமாற்றினார்.

இந்த நிலையில் 604 ரன்களை எட்டிய ஆஸ்திரேலியா தனது முதல் இன்னிங்ஸை டிக்ளேர் செய்தது. இந்திய தரப்பில் சிறப்பாக பந்துவீசிய அஸ்வின் 3 விக்கெட்களும், ஜாகிர்கான் 2 விக்கெட்களும் வீழ்த்தினர்.

அதன்பிறகு முதல் இன்னிங்ஸை துவக்கிய இந்திய அணியின் துவக்கத்தில் தடுமாற்றம் ஏற்பட்டது. 3 பவுண்டரிகள் எடுத்த ஷேவாக்(18) அத்தோடு போதும் என்பது போல அவுட்டாகிப் போய் விட்டார். டிராவிட் 1 ரன்னில் நடையை கட்டினார்.

அடுத்த வந்த சச்சின், துவக்க ஆட்டகாரர் கம்பிருடன் இணைந்து ஆடினார். போட்டியின் 2வது நாள் முடிவில் இந்தியா 2 விக்கெட்களை இழந்து 61 ரன்களை எடுத்திருந்தது. கம்பிர்(30), சச்சின்(12) ஜோடி நாளை 3வது நாள் ஆட்டத்தை தொடரும்.

தட்ஸ் தமிழ்