திங்கட்கிழமை, 30, ஜனவரி 2012 (11:13 IST)
பெங்களூரில் திருவள்ளுவர் சிலை ஊர்வலம்



திருவள்ளுவர் தினத்தையொட்டி பெங்களூர் தமிழ்ச் சங்கம் சார்பில் (29.01.2012) திருவள்ளுவர் சிலையுடன் ஊர்வலம் நடைபெற்றது. இதில் ஏராளமானவர்கள் கலந்து கொண்டனர்.


திருவள்ளுவர் தினத்தையொட்டி பெங்களூர் தமிழ்ச் சங்கம் சார்பில் ஆண்டுதோறும் திருவள்ளுவர் சிலை ஊர்வலம் நடத்தப்படுகிறது. அதே போல் இந்த ஆண்டும் பெங்களூர் தமிழ்ச் சங்கம் சார்பில் திருவள்ளுவர் சிலை ஊர்வலம் நேற்று நடைபெற்றது.


பெங்களூர் அல்சூர் ஏரிக்கரையில் அமைந்துள்ள திருவள்ளுவர் சிலையில் இருந்து ஊர்வலம் புறப்பட்டு டிக்கன்சன் ரோடு, காமராஜர் ரோடு, அண்ணாசாமி முதலியார் ரோடு வழியாக பெங்களூர் தமிழ்ச் சங்க கட்டிடத்தை வந்து அடைந்தது.


இந்த ஊர்வலத்தில் பெங்களூர் தமிழ்ச் சங்க தலைவர் மீனாட்சி சுந்தரம் உள்பட ஏராளமானவர்கள் கலந்து கொண்டனர்.


ஊர்வலத்துக்கு முன்னதாக திருவள்ளுவர் சிலைக்கு தமிழ்ச் சங்க நிர்வாகிகள் மாலை அணிவித்து மரியாதை செலுத்தினர். கர்நாடக அரசின் கன்னட பண்பாட்டு துறை சார்பில் டொள்ளு குனிதா மற்றும் நாட்டுப்புற கலை நிகழ்ச்சி நடைபெற்றது.


இந்த ஊர்வலத்தில் திருக்குறள் வரிகள் பாடல்களாக பதிவு செய்யப்பட்ட ஒலி இசைக்கப்பட்டன. இதில் தமிழ் ஆர்வலர்கள், காமராசர் பள்ளிக்கூட மாணவ, மாணவிகள் உள்பட ஏராளமானவர்கள் கலந்து கொண்டனர். இந்த ஊர்வலத்துக்கு பலத்த போலீஸ் பாதுகாப்பு போடப்பட்டு இருந்தது.


இதுகுறித்து தமிழ்ச் சங்க தலைவர் மீனாட்சி சுந்தரம் நிருபர்களிடம் கூறியதாவது:


முன்னாள் முதல் மந்திரி எடியூரப்பாவின் உதவியால் பெங்களூரில் திருவள்ளுவர் சிலை திறக்கப்பட்டது. 3 வது ஆண்டாக நாங்கள் திருவள்ளுவர் சிலையுடன் ஊர்வலம் நடத்துகிறோம். தமிழர்களை ஒன்றுதிரட்டி எழுச்சியை ஏற்படுத்த வேண்டும் என்பது தான் இந்த ஊர்வலத்தின் நோக்கம்.


தமிழர்கள் அதிக அளவில் வந்து கலந்து கொண்டுள்ளனர். இந்த ஊர்வலத்தை ஆண்டுதோறும் நடத்துவோம். எடியூரப்பாவுக்கு வருகிற 5 ந் தேதி பாராட்டு விழா நடத்துகிறோம். அதில் தமிழர்கள் அதிக அளவில் வந்து கலந்து கொள்ள வேண்டும் என்று கேட்டுக் கொள்கிறேன். இவ்வாறு மீனாட்சி சுந்தரம் கூறினார்.

நக்கீரன்

இந்த ஊர்வலத்தில் திருக்குறள் வரிகள் பாடல்களாக பதிவு செய்யப்பட்ட ஒலி இசைக்கப்பட்டன. இதில் தமிழ் ஆர்வலர்கள், காமராசர் பள்ளிக்கூட மாணவ, மாணவிகள் உள்பட ஏராளமானவர்கள் கலந்து கொண்டனர்