சிட்னி, ஜன.31-

இந்திய கிரிக்கெட் அணி ஆஸ்திரேலியாவில் சுற்றுப்பயணம் செய்து விளையாடி வருகிறது. இந்திய அணிதான் ஆடிய 4 டெஸ்டிலும் தோற்று மிகுந்த ஏமாற்றம் அடைந்தது. இந்தியா- ஆஸ்திரேலியா இடையே இரண்டு 20 ஓவர் போட்டி நடத்தப்படுகிறது.

முதலாவது 20 ஓவர் ஆட்டம் சிட்னியில் நாளை (புதன்கிழமை) நடக்கிறது. டெஸ்ட் தொடரில் ஏற்பட்ட மோசமான தோல்வியில் இருந்து இந்திய அணி மீண்டெழுமா என்று அனைவராலும் எதிர்பார்க்கப்படுகிறது. 20 ஓவர் போட்டியை பொறுத்தவரை எந்த அணி வெற்றிபெறும் என்று சொல்லிவிட இயலாது. உள்ளூரில் விளையாடுவது ஆஸ்திரேலியாவுக்கு சாதகமே. டெஸ்ட் அணியில் இடம் பெறாத ரெய்னா, ரவிந்திர ஜடேஜா, இர்பான் பதான், மனோஜ் திவாரி, பிரவீண்குமார், பார்த்தீவ்பட்டேல், ராகுல் சர்மா ஆகியோர் அணியோடு இணைந்து உள்ளனர்.

ராகுல் டிராவிட், லட்சுமண், இஷாந்த்சர்மா, ஒஜா, விர்த்திமான் சகா, ரகானே, அபிமன்யூ மிதுன் ஆகியோர் நாடு திரும்பியுள்ளனர். டெஸ்ட் அணியில் இடம் பெற்றும் வாய்ப்பு கிடைக்காத ரோகித்சர்மா 20 ஓவர் போட்டியில் தனது பங்களிப்பை வெளிப்படுத்துவார் என்று தெரிகிறது. ரெய்னா, ஜடேஜா ஆகியோர் 20 ஓவரில் சிறப்பாக விளையாடக் கூடியவர்கள்.

டெஸ்டில் மோசமாக ஆடிய கேப்டன் டோனி, ஷேவாக், காம்பீர் ஆகியோர் 20 ஓவரில் நன்றாக ஆட வேண்டிய கட்டாயம் உள்ளது. ஆஸ்திரேலிய அணிக்கு பெய்லி கேப்டனாக உள்ளார். வார்னர், கிறிஸ்டியன், டேவிட் ஹஸ்சி போன்ற சிறந்த அதிரடி பேட்ஸ்மேன்கள் உள்ளனர். டெஸ்டை வென்றது போலவே 20 ஓவர் போட்டியிலும் அந்த அணி ஆதிக்கம் செலுத்த முயற்சிக்கும். இந்த ஆட்டம் இந்திய நேரப்படி பிற்பகல் 2.05 மணிக்கு தொடங்குகிறது.

ஸ்டார் கிரிக்கெட் சேனலில் நேரடியாக ஒளிபரப்பு செய்யப்படுகிறது.

இரு அணி வீரர்கள் வருமாறு:-

இந்தியா: டோனி (கேப்டன்), ஷேவாக், காம்பீர், வீராட் கோலி, ரோகித் சர்மா, ரெய்னா, ரவிந்திர ஜடேஜா, அஸ்வின், ஜாகீர்கான், பிரவீண்குமார், வினய்குமார், பார்த்தீவ் பட்டேல், ராகுல் சர்மா, உமேஷ் யாதவ், மனோஜ் திவாரி, இர்பான் பதான்.

ஆஸ்திரேலியா: பெய்லி (கேப்டன்), வார்னர், கிறிஸ்டியன், பவ்ல்கர், டோகர்ட்டி, டேவிட் ஹஸ்சி, பெர்ட்லீ, மெக்காய், பிரட் ஹோக், மைக்கேல் மார்ஷ், மேத்யூ வாடே, ஆரோன் பிஞ்ச், ஷான் மார்ஷ், டிராவிஸ் பெர்ட்.

மாலைமலர்