திமுக உள்கட்சி மோதல்: மதுரை மாநகர் மாவட்ட அவைத் தலைவர் நீக்கம்

சென்னை, ஏப். 22: மதுரையில் திமுக பொருளாளர் மு.க. ஸ்டாலின் தலைமையில் நடைபெற்ற அக்கட்சிக் கூட்டத்தைப் புறக்கணித்தது தொடர்பாக மாநகர் மாவட்ட அவைத் தலைவர் க. இசக்கிமுத்து கட்சியிலிருந்து நீக்கம் செய்யப்பட்டுள்ளார்.

கூட்டத்தைப் புறக்கணித்த மற்றவர்கள் மீது, அவர்கள் அனுப்புகின்ற விளக்கத்தைப் பொறுத்து நடவடிக்கை எடுக்கப்படும் என திமுக தலைமை அலுவலகம் ஞாயிற்றுக்கிழமை அறிவித்துள்ளது.

மு.க.ஸ்டாலின் தலைமையில் மதுரையில் நடைபெற்ற இளைஞரணிக் கூட்டத்தை தென்மண்டல அமைப்புச் செயலாளர் மு.க. அழகிரியின் ஆதரவாளர்கள் புறக்கணித்தனர்.

இந்த விவகாரம் தொடர்பாக அக்கட்சியினர் 17 பேருக்கு திமுக தலைமை அமைப்புச் செயலாளர் டி.கே.எஸ். இளங்கோவன் விளக்கம் கேட்டு நோட்டீஸ் அனுப்பி இருந்தார். அதற்கு மதுரை மாநகர் மாவட்ட திமுகவினர், அழகிரியை ஆலோசிக்காமல் கூட்டத்தை நடத்தியது தங்களுக்கு அதிருப்தியை ஏற்படுத்தியது என்றும், அழகிரிதான் தங்களுக்கு எல்லாம் என்றும், அவரை அவமதித்ததால் கூட்டத்தைப் புறக்கணித்தோம் என்றும் விளக்கம் தெரிவித்திருந்தனர்.

அதில் இசக்கிமுத்து அளித்த விளக்கம் மட்டுமே திமுக தலைமைக்கு கிடைத்துள்ளது. அந்த விளக்கத்தை ஸ்டாலின் ஏற்கவில்லை. புறக்கணித்தவர்கள் மீது நடவடிக்கை எடுக்க வேண்டும் என்று அவர் கருணாநிதியிடம் தொடர்ந்து வலியுறுத்தி வருகிறாராம்.

மேலும், 17 பேர் மீதும் நடவடிக்கை எடுக்க விட்டால் தன்னுடைய பதவியை ராஜிநாமா செய்யப் போவதாகவும் கூறி வருகிறாராம்.
நடவடிக்கை: இந்தப் பிரச்னையை முடிவுக்குக் கொண்டு வர கருணாநிதி பல்வேறு நடவடிக்கைகள் எடுத்துப் பார்த்தார். ஆனால், எதிலும் பிரச்னைக்கு தீர்வு ஏற்படாததால் இப்போது நடவடிக்கை மேற்கொண்டுள்ளார்.

இசக்கிமுத்து அளித்த அறிக்கை கருணாநிதியை மிகவும் கோபப்படுத்தியதாகத் தெரிகிறது.

எங்களிடம் விளக்கம் கேட்கும் உரிமை இளங்கோவனுக்கு இல்லை என்றும், பொதுச்செயலாளர் க. அன்பழகன், தென்மண்டல அமைப்புச் செயலாளர் மு.க. அழகிரி ஆகியோர் மட்டுமே விளக்கம் கேட்க முடியும் என்றும் இசக்கிமுத்து கூறியிருந்தார். இந்த விளக்கத்தை அனுமதிக்க முடியாது என்று அவரை சஸ்பெண்ட் செய்ய கருணாநிதி உத்தரவிட்டார்.

இது தொடர்பாக திமுக பொதுச் செயலாளர் க. அன்பழகன் ஞாயிற்றுக்கிழமை வெளியிட்ட அறிக்கை:

மதுரை மாநகர் மாவட்டக் கழக அவைத் தலைவர் இசக்கிமுத்து கட்சியின் சாதாரண உறுப்பினர் உள்பட அனைத்து பொறுப்புகளிலிருந்தும் விலக்கி வைக்கப்படுவதோடு, அடுத்து புதிய உறுப்பினர்கள் சேர்க்கும்போதும், அவர் உறுப்பினராகச் சேர்ந்திட தகுதியற்றவராகக் கருதப்படுவார்.

கூட்டத்தைப் புறக்கணித்த பிறர் மீது, அவர்கள் அனுப்புகின்ற விளக்கத்தின் அடிப்படையில் உரிய நடவடிக்கை மேற்கொள்ளப்படும் என்று அதில் தெரிவிக்கப்பட்டுள்ளது.

அடுத்தது என்ன... மதுரையில் நடந்த நிர்வாகிகள் கூட்டத்தில், கட்சித் தலைமைக்கு விளக்கம் அளித்துள்ள 17 பேரிடமும், ""விளக்கம் அளித்ததோடு இந்தப் பிரச்னையிலிருந்து விலகிக் கொள்ளுங்கள். மற்றவற்றை நான் பார்த்துக் கொள்கிறேன். தலைமை என்னிடம் விளக்கம் கேட்டால் தெரிவித்துக் கொள்கிறேன்'' என்று அழகிரி கூறியுள்ளதாகத் தெரிகிறது.

கட்சியிலிருந்து ஒருவரை நீக்குவது சாதாரணம்

கட்சியிலிருந்து ஒருவரை நீக்குவது சர்வ சாதாரணம். இது தொடர்பாக கருத்துக் கூற விரும்பவில்லை என்று திமுகவின் தென்மண்டல அமைப்புச் செயலாளர் மு.க. அழகிரி கூறினார்.

மதுரை மாநகர் மாவட்ட திமுக இளைஞரணி கூட்டத்தைப் புறக்கணித்தது தொடர்பாக மு.க. அழகிரியின் ஆதரவாளர் இசக்கிமுத்து நீக்கம் செய்யப்பட்டுள்ளார்.

இது தொடர்பாக மு.க. அழகிரியிடம் கருத்து கேட்டபோது அவர் கூறியது:

அதிமுகவில் தினமும் ஒருவரை கட்சியிலிருந்து நீக்கம் செய்கிறார்கள். அது தொடர்பாக கருத்து கேட்டு செய்தி வெளியிடுகிறீர்களா? திமுகவில் மட்டும் நீக்கம் செய்தால் கருத்து சொல்ல வேண்டுமா? கட்சியிலிருந்து ஒருவரை நீக்குவது எல்லாம் சர்வ சாதாரணம். அதற்குமேல் கருத்து சொல்ல விரும்பவில்லை என்றார்.

தினமணி