இன்று காலையில் புதுவை மகாத்மாகாந்தி மருத்துவ கல்லூரிக்கு
அப்துல்கலாம் காரில் சென்றார். அங்கு உள்ள மரபணுசோதனை ஆய்வகத்தை
பார்வையிட்டார். அதில் வைக்கப்பட்டிருந்த மாணவர்களின் படைப்புகளை கண்டு
வியந்து மகிழ்ந்தார். பின்னர் அங்கு நடைபெற்ற நிகழ்ச்சியில் கலந்து கொண்டு
அப்துல்கலாம் பேசியதாவது:-

சிறந்த மருத்துவம்
என்பது மருத்துவ செலவை குறைப்பதாக இருக்க வேண்டும். எளிய முறையில்
அனைவருக்கும் நவீன தொழில் நுட்பத்துடன் கூடிய மருத்துவ வசதி கிடைக்க
வேண்டும். மருத்துவ மாணவர்கள் முதலில் ஆராய்ச்சியில் ஈடுபடவேண்டும்.
பின்னர் அதனை பிறருக்கு கற்பிக்க வேண்டும்.
அதன்பிறகு மீண்டும் ஆராய்ச்சி செய்ய வேண்டும்.

நோயாளி
முழுமையாக குணமடையும் வரை சிகிச்சையளிக்க வேண்டும். ஒருவேளை அதில்
நோயாளிக்கு திருப்தி ஏற்படாவிட்டால் அந்த மருத்துவத்துக்கு கட்டணம்
வசூலிக்க கூடாது.

இவ்வாறு அவர் பேசினார்.

பிறகு
மருத்துவ கல்லூரி மாணவ-மாணவிகளுடன் அப்துல்கலாம் கலந்துரையாடலில்
ஈடுபட்டார். அப்போது அப்துல்கலாமிடம் மாணவர்கள் கேட்ட கேள்விகளுக்கு அவர்
அளித்த பதில்களின் விபரம் வருமாறு:-

கேள்வி: ஜனாதிபதி அப்துல்கலாமுக்கும், அப்துல்கலாமுக்கும் என்ன வேறுபாடு?

பதில்:
50 ஆண்டுகள் அப்துல் கலாமாக இருந்தேன். 5 ஆண்டுகள்தான் ஜனாதிபதி அப்துல்
கலாமாக பணிபுரிந்தேன். இந்த 5 ஆண்டுகளில்தான் 7 1/2 மில்லியன் இளைஞர்களை
என்னால் சந்திக்க முடிந்தது. எனது பயணத்துக்காக கிடைத்த அதிநவீன
போக்குவரத்து வசதிகளை இளைஞர்களை சந்திப்பதற்காக பயன்படுத்தி கொண்டேன். அதன்
மூலம் அப்துல்கலாமாக 50 ஆண்டுகளில் சாதிக்க முடியாததை இந்த 5 ஆண்டுகளில்
சாதிக்க முடிந்தது.

கேள்வி: நீங்கள் படிக்கும் காலத்துக்கும், தற்போதைய காலத்துக்கும் கல்வி முறையில் என்ன வேறுபாடு உள்ளது?

பதில்:
கல்வி முறை என்பது எப்படியிருந்தாலும், ஆசிரியர்கள்தான் மாணவர்களின்
எண்ணங்களை மாற்றுகின்றனர். ஆசிரியர்களால்தான் மாணவர்களிடம் மிகப்பெரிய
மாற்றங்களை உருவாக்க முடியும்.

கேள்வி: அணுமின் உலை பற்றி உங்களுடைய கருத்து என்ன?

பதில்:
ஜப்பான் புகுஷிமாவில் உள்ள அணு மின் உலை கடல் மட்டத்தைவிட 2 மீட்டர்தான்
உயரமாக உள்ளது. 9 1/2 மீட்டர் உயரத்துக்கு கடலில் சுனாமி அலைகள் எழுந்தபோது
அந்த அணுமின் உலையை தாக்கியது. ஆனால் கூடங்குளம் அணுமின் உலை கடல்
மட்டத்தை விட 15 1/2 மீட்டர் உயரத்தில் உள்ளது. எனவே அது பாதுகாப்பான
நிலையில் இருக்கிறது.

கேள்வி: ஜனாதிபதியை மக்களே நேரடியாக ஏன் தேர்ந்தெடுக்க கூடாது?

பதில்:
இந்தியாவில் 1950-ம் ஆண்டில் உருவாக்கப்பட்ட அரசியலமைப்பு சட்டத்தின்
கீழ்தான் ஜனநாயக ஆட்சி நடைபெற்று வருகிறது. எனவே அதனை மாற்ற வேண்டுமெனில்
அரசியல் சட்ட நிபுணர்கள்தான் முடிவு செய்ய வேண்டும்.

பின்னர் அப்துல்கலாம் நிருபர்களுக்கு அளித்த பேட்டியின்போது கூறியதாவது:-

இன்றைய
சூழலில் இளைஞர்கள் கண்டிப்பாக அரசியலுக்கு வரவேண்டும். அவர்களால்தான்
இந்தியாவில் மிகப்பெரிய மாற்றங்களை உருவாக்க முடியும். தேசநலனை மட்டுமே
கருத்தில் கொண்டு இளைஞர்கள் ஒருங்கிணைந்து செயல்பட வேண்டும்.

இவ்வாறு அவர் கூறினார்.

-மாலைமலர்