தண்டனையை எதிர்த்து ஆந்திர பெற்றோர் அப்பீல் !

**krishnaamma** · **krishnaamma** Fri Dec 07, 2012 11:41 am

ஆஸ்லோ : ஏழு வயது மகனை மிரட்டி, அடித்து, சூடு போட்டதாக தொடரப்பட்ட வழக்கில், நார்வே நீதிமன்றத்தால் சிறை தண்டனை விதிக்கப்பட்ட ஆந்திர தம்பதி மேல்முறையீடு செய்துள்ளனர். ஐதராபாத்தைச் சேர்ந்தவர் சந்திரசேகர். இவரது மனைவி அனுபாமா. இவர்களுக்கு 2 மகன்கள். நார்வேயின் ஆஸ்லோ நகரில் உள்ள டிசிஎஸ் நிறுவனத்தில் சந்திரசேகர் பணியாற்றுகிறார். குடும்பத்துடன் அவர் ஆஸ்லோவில் வசித்து வருகிறார்.

சந்திரசேகரின் மூத்த மகன் சாய் ஸ்ரீராம் (7), தான், கால்சட்டையில் சிறுநீர் கழித்ததால் பெற்றோர் அடிப்பதாகவும், இந்தியாவுக்கு அனுப்பி விடுவதாக மிரட்டுவதாகவும் தனது பள்ளி ஆசிரியரிடம் கூறியுள்ளான். பள்ளி நிர்வாகம் போலீசில் புகார் செய்தது. புகாரின்பேரில், சந்திரசேகரையும், அனுபாமாவையும் போலீசார் கைது செய்து சிறையில் அடைத்தனர்.

இந்த வழக்கை விசாரித்த ஆஸ்லோ மாவட்ட நீதிமன்றம், சந்திரசேகருக்கு 18 மாதமும், அனுபாமாவுக்கு 15 மாதமும் சிறை தண்டனை விதித்து கடந்த செவ்வாய்கிழமை உத்தரவிட்டது. இந்நிலையில், சந்திரசேகர் மற்றும் அனுபாமா தரப் பில் அந்நாட்டு உயர் நீதிமன்றத்தில் நேற்று மேல்முறையீடு மனு தாக்கல் செய்யப்பட்டுள்ளது. இம்மனு விரைவில் விசாரணைக்கு வரும் என தெரிகிறது.