ஈரான் சிறையில் இருந்து விடுதலையான 26 மீனவர்கள் இன்று குமரி வருகை

ஈரான் சிறையில் இருந்து விடுவிக்கப்பட்ட குமரி மாவட்ட மீனவர்கள் 26 பேர் உள்பட 29 மீனவர்களும் இன்று சொந்த ஊர் திரும்புகின்றனர். குமரி மாவட்ட மீனவர்கள் கத்தாரில் தங்கி மீன்பிடி தொழில் செய்து வருகின்றனர். கடந்த ஆண்டு அக்டோபர் 10-ம் தேதி கடலில் மீன் பிடித்துக் கொண்டிருந்தபோது இயற்கை சீற்றத்தால் வழிதவறி சென்றனர். அப்போது ஈரான் நாட்டு கடற்படையால் 29 மீனவர்கள் சிறைபிடிக்கப்பட்டனர். இதில் குமரி மாவட்டத்தை சேர்ந்தவர்கள் 26 பேர். 2 பேர் கேரளாவையும் ஒருவர் காரைக்காலையும் சேர்ந்தவர்கள். இவர்களில் 22 பேர் கோர்ட்டில் ஆஜர்படுத்தப்பட்டு சிறையில் அடைக்கப்பட்டனர்.

மற்ற 7 பேரும் படகில் காவல் வைக்கப்பட்டனர். மீனவர்களுக்கு விதிக்கப்பட்ட அபராத தொகையை அவர்களின் முதலாளிகள் செலுத்தியதால் எல்லாரும் விடுவிக்கப்பட்டனர். ஆனால், விடுவிக்கப்பட்ட 22 பேரும், இக்கிஷ் தீவில் உள்ள துறைமுக பகுதியில் மற்ற 7 மீனவர்களுடன் படகில் தங்க வைக்கப்பட்டனர். கடந்த ஒரு மாதத்துக்கும் மேலாக இவர்கள் சொந்த ஊருக்கு அனுப்பி வைக்கப்படவில்லை. இதுதொடர்பாக நாடாளுமன்றத்தில் ஹெலன் டேவிட்சன் எம்.பி. குரல் கொடுத்தார். பிரதமர், வெளியுறவுத்துறை அமைச்சர், வெளிநாடுகள் வாழ் இந்தியர்கள் நலத்துறை அமைச்சர் உள்ளிட்டோருக்கும் கோரிக்கை வைத்தார்.

திமுக தலைவர் கருணாநிதியும் மீனவர்களை விடுவிக்க வேண்டும் என்று பிரதமரை வலியுறுத்தியிருந்தார். அதன் அடிப்படையில் மீனவர்களை மீட்கும் நடவடிக்கைகள் மத்திய அரசால் முடுக்கிவிடப்பட்டன. இந்நிலையில், 29 மீனவர்களும் நேற்று விடுவிக்கப்பட்டனர். இது தொடர்பான தகவலை ஈரானில் உள்ள தூதரக அதிகாரி மனோஜ், ஹெலன் டேவிட்சன் எம்.பி.க்கு தெரிவித்துள்ளார். மீனவர்கள் அனைவரும் அபுதாபி அழைத்து செல்லப்பட்டுள்ளனர். குமரி மாவட்ட மீனவர்கள் 26 பேரும் இன்று இரவு விமானம் மூலம் திருவனந்தபுரம் வழியாக சொந்த ஊர் வருகின்றனர். அவர்களை வரவேற்க உறவினர்களும் சக மீனவர்களும் காத்திருக்கின்றனர்.

தமிழ்முரசு