Search found 1 match for வெள்ளை_தங்கம்

சுற்றுச்சூழலுக்கு பெரும் அச்சுறுத்தலாக இருப்பதால், தமிழ்நாட்டில் பெட்ரோல், டீசல் வாகனங்களுக்கு மாற்றாக மின்சார வாகனங்களின் பயன்பாட்டை ஊக்குவிக்க பெரும் முயற்சிகள் நடந்து வருகின்றன.

சுற்றுச்சூழலுக்கு பெரும் அச்சுறுத்தலாக இருப்பதால், தமிழ்நாட்டில் பெட்ரோல், டீசல் வாகனங்களுக்கு மாற்றாக மின்சார வாகனங்களின் பயன்பாட்டை ஊக்குவிக்க பெரும் முயற்சிகள் நடந்து வருகின்றன. இந்தியாவில் கச்சா எண்ணெய் வளம் இல்லை. நம் தேவைக்கு 80 சதவீதத்துக்கு மேலான கச்சா எண்ணெய் வெளிநாடுகளில் இருந்துதான் இறக்குமதி செய்யப்படுகின்றன. இதனால், நாட்டின் அன்னிய செலாவணியின் பெரும்பகுதி கச்சா எண்ணெய் வாங்குவதற்கே செலவாகிவிடுகிறது. நடப்பு கணக்கு பற்றாக்குறை ஏற்படுவதற்கு முக்கிய காரணம் கச்சா எண்ணெய் இறக்குமதிதான்.

மின்சார வாகனங்களுக்கு சரக்கு சேவை வரி குறைவாகவே வசூலிக்கப்படுகிறது. தமிழக அரசும் மின்சார வாகன தொழில்களை ஈர்க்க பல்வேறு சலுகைகளை வழங்கி வருகிறது. அ.தி.மு.க. அரசில் எடப்பாடி பழனிசாமி முதல்-அமைச்சராக இருந்தபோது, 2019-ல் மின்சார வாகன கொள்கை என்று தனியாக ஒரு கொள்கையை வெளியிட்டார். இப்போது முதல்-அமைச்சர் மு.க.ஸ்டாலின் மின்சார வாகன கொள்கை 2023-ஐ வெளியிட்டு பல சலுகைகளை அறிவித்துள்ளார். தி.மு.க. அரசு அமைந்தவுடன், தொழில் துறை அமைச்சர் தங்கம் தென்னரசு, கூடுதல் தலைமை செயலாளர் எஸ்.கிருஷ்ணன் ஆகியோர் மின்சார வாகன தொழிற்சாலைகளை தமிழ்நாட்டில் தொடங்குவதற்கு தீவிரமாக முயற்சிகள் எடுத்ததன் விளைவாக, தமிழ்நாட்டில் மின்சார வாகன உற்பத்தி தொழிற்சாலைகள் வருகின்றன. கிருஷ்ணகிரி மாவட்டத்தில் மின்சார வாகனங்கள் உற்பத்திக்காகவே மின்சார வாகனங்கள் பூங்கா அமைக்கப்பட இருக்கிறது என்று எஸ்.கிருஷ்ணன் கூறினார்.

மின்சார வாகனங்களை மக்கள் பெருமளவில் பயன்படுத்துவதற்காக, மத்திய-மாநில அரசுகள் எவ்வளவோ முயற்சிகளை எடுத்தாலும், அதன் விலை அதிகமாக இருப்பதால், மக்கள் மின்சார வாகனங்களை வாங்க தயக்கம் காட்டுகிறார்கள். மின்சார வாகனங்களின் விலையில் பெரும்பங்கு, லித்தியம் பேட்டரி விலைக்கே போய்விடுகிறது. லித்தியம் பேட்டரியை வைத்துத்தான் மின்சார வாகனங்களை இயக்க முடியும். இந்த பேட்டரியை தயாரிப்பதற்கு தேவையான லித்தியம் கனிமம் இந்தியாவில் கிடைக்காத நிலையே இருந்தது. சீனா போன்ற வெளிநாடுகளில் இருந்துதான் இறக்குமதி செய்யப்பட்டுவந்தது. இதன்விலை மிக அதிகமாக இருப்பதால்தான், மின்சார வாகனங்களின் விலை சாதாரண, நடுத்தர மக்களுக்கு எட்டும் தூரத்தில் இல்லை. இந்தநிலை இப்போது மாறப்போகிறது. மிகப்பெரிய புரட்சியாக ஜம்மு காஷ்மீரில் உள்ள ராசி பகுதியில் 59 லட்சம் டன் லித்தியம் படிவம் கண்டுபிடிக்கப்பட்டுள்ளதாக இந்திய புவியியல் ஆய்வு மையம் அறிவித்துள்ளது.

இந்த #லித்தியம், இந்தியாவின் தேவையை பூர்த்தி செய்யும் என்று எதிர்பார்க்கப்படுகிறது. #வெள்ளை_தங்கம் என்று அழைக்கப்படும் லித்தியம், மின்சார வாகனங்களுக்கு மட்டுமல்லாமல், எல்லா மின்னணு சாதனங்களுக்கும் தேவையான ஒன்றாக இருக்கிறது. ரீசார்ஜ் செய்ய வேண்டிய பேட்டரிகள் இருக்கும் செல்போன், லேப்டாப், டிஜிட்டல் கேமரா ஆகியவற்றுக்கெல்லாம் லித்தியம் தேவை. இவ்வளவு நாளும் வெளிநாடுகளிலிருந்து இறக்குமதி செய்யப்பட்டு வந்த நிலையில், இனி அதற்கு அவசியம் இல்லை என்பதால், விரைவில் #மின்சார_வாகனங்கள் விலை மட்டுமல்லாமல், இந்த மின்னணு சாதனங்களின் விலையும் குறையப்போகிறது. ஆனால், இந்த லித்தியம் படிவங்களை கண்டுபிடித்ததோடு நின்றுவிடாமல் அதை வெட்டி எடுக்கும் பணிகளையும் உடனே தொடங்கவேண்டும். ஜம்மு காஷ்மீரில் மட்டுமல்லாமல், இந்தியாவில் வேறு எந்தெந்த பகுதிகளில் எல்லாம் லித்தியம் படிவங்கள் இருக்கிறது என்பதற்கான ஆய்வுகளை இந்திய புவியியல் ஆய்வு மையம் தீவிரமாக மேற்கொள்ளவேண்டும்.