கூலி கேட்டால் கொலை... கொலை செய்வதில் பெருமை!

பீகார் மாநிலத்தில் உயர் சாதி நிலப்பிரபுக்களின் நிலங்களில் வேலைபார்த்த தலித் மக்கள், கொத்தடிமைகளைவிட மோசமாக நடத்தப்பட்டனர். 1995-களில் உழைப்புக்கு ஏற்ற கூலி கேட்டு சிறுசிறு குழுக்களாகப் போராடிய தலித் மக்களை, கம்யூனிஸ்ட் கட்சியைச் சேர்ந்தவர்கள் ஒன்றுதிரட்டி மாநிலம் தழுவிய பெரும் போராட்டம் செய்ய வைத்தனர். போராட்டத்தை ஒடுக்க நினைத்த தரிச்சந்திர சிங் என்ற நிலப்பிரபு, அவரது உறவினரான முன்னாள் ராணுவ வீரர் ரண்வீர் செளத்ரியின் உதவியுடன் ‘ரண்வீர் சேனா’ என்ற படையை உருவாக்கினார். இந்தப் படையைச் சேர்ந்த உறுப்பினர்களுக்கு ஏ.கே-47, எல்.எம்.ஜி போன்ற ராணுவம் பயன்படுத்தி ஒதுக்கிய ஆயுதங்களை கையாளப் பயிற்சி அளிக்கப்பட்டது.

இந்த நிலையில் 1997 டிசம்பர் 1, லக்‌ஷ்மண்பூரில் தலித் மக்கள் குடியிருப்புகளின் மீது ரண்வீர் சேனா படையினர் வன்முறையில் ஈடுபட்டதில் 53 தலித் மக்கள் கொடூரமாகக் கொல்லப்பட்டனர். மனிதத்தன்மைக்கே தலைக்குனிவை ஏற்படுத்தும் வகையில், கர்ப்பிணி பெண்களைக் கொன்று வயிற்றில் இருந்த சிசுவை துண்டுதுண்டாக வெட்டிய கொடூரம் முதலில் இங்குதான் நடந்தது. அடுத்த ஐந்து ஆண்டுகளில் பீகாரில் உள்ள போஜ்பூர், கயா, அவுரங்காபாத், அரா, அர்வல், ஜனாபாத் மாவட்டங்களில் உள்ள தலித் மக்கள் மீது தாக்குதல் நடத்தி 144 பேரை துள்ளத்துடிக்கக் கொன்றனர். இந்தப் படுகொலைகளை முன்னின்று நடத்தியதாக கைது செய்யப்பட்ட ரண்வீர் சேனா படையைச் சேர்ந்த 36 பேரை 2013-ம் ஆண்டு பாட்னா உயர் நீதிமன்றம் விடுதலை செய்தது நாட்டையே பெரும் அதிர்ச்சிக்குள்ளாக்கியது.

இந்த நிலையில், ‘ஆபரேஷன் பிளாக் ரெயின்’ என்ற பெயரில் கோப்ரா போஸ்ட் இணையதளம், விடுதலை செய்யப்பட்ட ரண்வீர் சேனாவின் கட்டளைத் தலைவர்களை ரகசிய கேமரா மூலம் கண்காணித்தது. அதில் படுகொலைகளைத் திட்டமிட்டு நடத்தியதாக ரண்வீர் சேனாவைச் சேர்ந்தவர்கள் ஒப்புதல் வாக்குமூலம் அளித்திருப்பதையும், அவர்களைக் காப்பாற்ற பி.ஜே.பி-யின் மூத்த தலைவர்கள் சிலர் உதவியதையும் கோப்ரா போஸ்ட் இணையதளம் ஆவணப்படமாக வெளியிட்டிருக்கிறது.

கோப்ரா போஸ்ட் இணையதளத்துடன் பீகார் படுகொலை குறித்து களஆய்வு செய்த தேசிய நீதிக்கான தலித் இயக்க பொதுச் செயலாளர் ரமேஷ்நாதனிடம் பேசினோம். ‘‘இந்தப் படுகொலைகள் குறித்து விசாரிக்க நீதிபதி அமீர்தாஸ் தலைமையில் ஒரு விசாரணைக் குழு அமைக்கப்பட்டது. 2005-ல் ஐக்கிய ஜனதா தளம், பி.ஜே.பி கூட்டணி தலைமையிலான அரசு ஆட்சி அமைந்ததும் இந்த விசாரணைக்குழு கலைக்கப்பட்டது. சுதந்திர இந்தியாவின் வரலாற்றிலேயே ஒரு விசாரணைக்குழு தனது விசாரணையை முடித்து அறிக்கையை சமர்ப்பிக்கும் முன்பே கலைக்கப்பட்டது இதுவே முதல் முறை.

கீழ் நீதிமன்றத்தில் படுகொலையை முன்நின்று நடத்திய ரண்வீர் சேனாவைச் சேர்ந்த 26 பேருக்கு ஆயுள் தண்டனையும் 10 பேருக்கு மரண தண்டனையும் கிடைத்தது. ஆனால், பாட்னா உயர் நீதிமன்றம் போதிய ஆதாரம் இல்லை என்று அனைவரையும் விடுதலை செய்துள்ளது. விடுதலை செய்யப்பட்டவர்கள் நிரபராதிகள் என்றால், பிறகு 114 தலித் மக்களைக் கொன்றது யார் என்று பாதிக்கப்பட்ட மக்கள் கேட்கிறார்கள். இதுதொடர்பாக விடுதலை செய்யப்பட்டவர்களை ரகசியமாக சந்தித்தோம். அவர்கள் பெருமிதத்துடன் வன்முறை வெறியாட்டத்தை செய்தது நாங்கள்தான் என்று தைரியமாக ஒப்புக்கொள்கிறார்கள்.

இந்த ஆவணப்படத்தில் பேட்டியளிக்கும் சந்தேஸ்வர் சிங் என்பவர், பதானி கோலா என்ற கிராமத்தில் முன்நின்று நடத்திய தாக்குதலில் 32 பேர் படுகொலை செய்யப்பட்டனர். தப்பியோடிய ஐவரை கழுத்தை அறுத்துக் கொன்றதாக பேட்டியில் தெரிவிக்கிறார்.

ரண்வீர் சேனாவுக்கு உதவியாக இருந்த அரசியல் தலைவர்களின் பெயர்களைக் கேட்டால் அதிர்ச்சியாக உள்ளது. இன்றும் அந்தத் தலைவர்கள், மத்தியிலும் மாநிலத்திலும் அதிகாரம் மிக்கவர்களாக உள்ளனர். இந்துத்வாவும் சாதியமும் ஒன்றாகச் சேர்ந்து நடத்திய கொடிய வன்முறையில், பாதிக்கப்பட்ட மக்களுக்குத் துளியளவும் நியாயம் கிடைக்கவில்லை. இந்த ஆவணப்படத்தை ஆதாரமாக வைத்து உச்ச நீதிமன்றத்தில் மேல்முறையீடு செய்திருக்கிறோம்” என்றார் நம்பிக்கையுடன்.

நீதி கிடைக்குமா?

விகடன்