தென்னிந்தியாவின் அயோத்தி... கர்நாடக பா.ஜ.க-வின் தேர்தல் வியூகம்!

கர்நாடக அரசியலில், மடங்களும், மடாதிபதிகளும்தான் தேர்தலைத் தீர்மானிக்கும் சக்திகளாக இருக்கின்றனர்.

இரண்டு மாதங்களில் சட்டசபைத் தேர்தலை எதிர்கொள்ளவிருக்கும் கர்நாடகாவில், கடந்த 17-ம் தேதி இறுதி பட்ஜெட்டைத் தாக்கல் செய்தது அந்த மாநில பா.ஜ.க அரசு. அதில், ‘அறநிலையத்துறை சார்பில், மாநிலத்திலுள்ள கோயில்கள் மற்றும் மடங்களைப் புனரமைக்க, 1,000 கோடி ரூபாய் நிதி ஒதுக்கீடு; ராமநகரா மாவட்டத்தில் பிரமாண்ட ராமர் கோயில் கட்டப்படும்; ஆஞ்சநேயர் பிறந்ததாகக் கருதப்படும் அஞ்சனாத்திரி மலையில் சுற்றுலாவை மேம்படுத்த 100 கோடி ரூபாய் ஒதுக்கீடு; முக்கியக் கோயில்களை மேம்படுத்த 65 கோடி ரூபாய் ஒதுக்கீடு’ என இந்துக்களைக் குறிவைத்து அடுக்கடுக்கான திட்டங்கள் அறிவிக்கப்பட்டிருப்பது விவாதத்துக்குள்ளாகியிருக்கிறது.

ஹிஜாப் சர்ச்சையில் தொடங்கி, பசுவதை தடுப்பு, பள்ளிக் கட்டடங்களுக்கு காவி நிறம், இந்துக் கோயில்கள் அருகே மற்ற மதத்தினர் கடைகள் வைக்கக் கூடாதென்ற அறிவிப்பு வரையிலாக தனது ஒவ்வொரு நகர்விலும் கர்நாடக பா.ஜ.க-வினர் மதத்தை முன்வைத்தே செயல்படுவதாக விமர்சனம் இருந்துவருகிறது. இதை உறுதிப்படுத்துவதுபோல அண்மையில் தேர்தல் பிரசாரத்துக்காக வாக்குச் சேகரிக்க வந்த பா.ஜ.க தேசியத் தலைவர்களும் ‘பா.ஜ.க-வினர் இந்துக்களின் பாதுகாவலர்கள், காங்கிரஸார் இந்துக்களுக்கு எதிரானவர்கள்’ என்றே அதிகம் பேசினர்.

இந்த நிலையில், தற்போதைய பட்ஜெட் குறித்துப் பேசுகிற அரசியல் விமர்சகர்கள், ‘‘கர்நாடக அரசியலில், மடங்களும், மடாதிபதிகளும்தான் தேர்தலைத் தீர்மானிக்கும் சக்திகளாக இருக்கின்றனர். அதனால்தான் ஒட்டுமொத்த இந்து மக்களைக் கவரும் நோக்கத்தில், கோயில்கள் - மடங்களுக்கு மட்டுமே, ரூ.1,000 கோடி ரூபாய் ஒதுக்கப்படும் என பட்ஜெட்டில் அறிவித்துள்ளனர். ராமநகராவில் ராமர் கோயிலைக் கட்டி, ‘தென்னிந்தியாவின் அயோத்தி’யாக மாற்றுவதற்கான முயற்சிகளைச் செய்கிறார்கள். ஏற்கெனவே சமூகவாரியான வாக்குகளை அறுவடை செய்யும்விதமாக ஒக்கலிகா சமூகத்தைச் சேர்ந்த கெம்பே கவுடாவுக்கு 108 அடி உயரத்தில் பிரமாண்ட சிலை அமைத்தது மாநில பா.ஜ.க அரசு. மேலும் ஒக்கலிகா – லிங்காயத் மக்களை கவர்வதற்காக சிறப்பு இட ஒதுக்கீட்டையும் அறிவித்தனர்’’ என்கின்றனர்.

காங்கிரஸ், மதச்சார்பற்ற ஜனதா தளம் உள்ளிட்ட எதிர்க்கட்சியினரோ, ‘`பா.ஜ.க-வின் இந்த ஒட்டுமொத்த நகர்வும், ‘டார்கெட் இந்து ஓட் பேங்க்’ வியூகம்தான். ஆனால் பா.ஜ.க-வினர், ‘நாங்கள் தேர்தலில் வெல்ல, இந்துத்துவத்தைக் கையிலெடுக்கவில்லை. சமூகம், மதம் எனப் பிரித்தாளும் அரசியல் செய்யவில்லை’ என்றெல்லாம் மேடைக்கு மேடை பேசிவருவதுதான் உச்சபட்ச காமெடி. மக்கள் எல்லாவற்றையும் உன்னிப்பாக கவனிக்கிறார்கள். தேர்தலில் அவர்கள் சரியாக எதிர்வினையாற்றுவார்கள்’’ என்கின்றனர் குமுறலாக.

முதல்வர் பசவராஜ் பொம்மை பட்ஜெட் தாக்கல் செய்தபோது, முன்னாள் முதல்வர் சித்தராமையா உள்ளிட்ட எதிர்க்கட்சியினர் காதில் பூவோடு அமர்ந்திருந்ததுதான் ஹைலைட்!