ஒமர் மீது "ஷூ' வீசியவர்;மருத்துவமனையில் அனுமதி

ஸ்ரீநகர்:

ஜம்மு காஷ்மீர் மாநில முதல்வர் ஒமர் அப்துல்லா மீது "ஷூ' வீசிய
சஸ்பெண்ட் செய்யப்பட்ட போலீஸ் அதிகாரி, நெஞ்சுவலி காரணமாக மருத்துவமனையில்
சேர்க்கப்பட்டார். பின் போலீஸ் கட்டுப்பாட்டு அறையில் உள்ள போலீஸ்
மருத்துவமனைக்கு கொண்டு செல்லப்பட்டார். சுதந்திர தினத்தன்று, காஷ்மீர்
முதல்வர் ஒமர் அப்துல்லா, தேசியக் கொடியேற்றி வணக்கம் செலுத்திக்
கொண்டிருந்த போது, அவருக்குப் பின் வரிசையில் இருந்த அப்துல் அகத் ஜான்
என்பவர், முதல்வர் மீது தன் "ஷூ' ஒன்றை வீசியெறிந்தார். அது முதல்வர்
மீது படாமல், அவர் அருகில் விழுந்தது. அங்கிருந்த பாதுகாப்பு அதிகாரிகள்
அவரைக் கைது செய்தனர். விசாரணையில் குற்ற வழக்குகளில் சஸ்பெண்ட்
செய்யப்பட்ட போலீஸ் அதிகாரி அவர் என்பது தெரிந்தது. நேற்று அவர் தனக்கு
நெஞ்சுவலி ஏற்பட்டதாகக் கூறியவுடன், ஷெர் - இ - காஷ்மீர் மருத்துவ
அறிவியல் கழகத்தில் அவரை போலீசார் சிகிச்சைக்காக சேர்த்தனர்.
சிகிச்சையில் அவருக்கு உயர் ரத்த அழுத்தம் இருந்தது கண்டறியப்பட்டது.
அதன்பின், அவர், போலீஸ் கட்டுப்பாட்டு அறையில் உள்ள போலீஸ்
மருத்துவமனைக்கு கொண்டு செல்லப்பட்டார். இதுகுறித்து போலீஸ் செய்தித்
தொடர்பாளர் ஒருவர் கூறுகையில்,"இச்சம்பவத்துக்குப் பின், பந்திபோராவில்
உள்ள அவரது வீட்டுக்கு மக்கள் கூட்டம் கூட்டமாக வருகின்றனர். அதனால்,
அப்பகுதியில் ஊரடங்கு உத்தரவு கடுமையாக அமல்படுத்தப்பட வேண்டிய நிலை
உருவாகியுள்ளது. அப்துல், ஒரு அரசியல்வாதியை அணுகி அவர் மூலம் அனுமதிச்
சீட்டு பெற்று முதல்வரின் பின் பகுதி வரிசையில் அமர்ந்துள்ளார்' என்று
தெரிவித்தார்.