சவுதியில் ஒரு லட்சம் இந்தியர்கள் கைதாகும் அபாயம் !

**சிவா** · **சிவா** Sat 25 May 2013 - 18:20

ஜெட்டா: நிடாகுயத் என்ற பெயரில் சவுதி அரேபிய அரசு, தொழிலாளர் விதிமுறை அறிவித்துள்ளதை தொடர்ந்து, அங்குள்ள 75 ஆயிரத்துக்கும் மேற்பட்ட இந்தியர்களை, தாயகம் கொண்டும் வரும் பணி தீவிரமாக நடந்து வருகிறது. அவர்கள் குறிப்பிட்ட காலத்திற்குள் தாயகம் திரும்பாத பட்சத்தில், அவர்கள் கைதாகும் அபாயம் உள்ளதாக கூறப்படுகிறது.

நிடாகுயத் என்ற பெயரில், சவுதி அரேபிய அரசு, தொழிலாளர் விதிமுறைகளை அறிவித்துள்ளது. இதன்படி, வெளிநாட்டு தொழிலாளர்களை, நிறுவனங்கள் பணியில் அமர்த்தும் முன்னர், உள்ளூர் மக்களுக்கு பணி வழங்க வேண்டும் என கூறப்பட்டுள்ளது. இதனால், அந்த நாட்டில் பணியாற்றும், லட்சக்கணக்கான இந்திய தொழிலாளர்கள், வேலை இழக்கும் அபாயம் ஏற்பட்டுள்ளது. மேலும் அவர்கள், சவுதியிலிருந்து வெளியேற ஜூலை 3ம் தேதி கெடு விதிக்கப்பட்டுள்ளது. ஜூலை 3ம் தேதிக்குள் வெளியேறாவிட்டால், அவர்கள் கைது செய்யப்படுவார்கள் என அறிவிக்கப்பட்டுள்ளது. இதனையடுத்து, அங்கு பணியாற்றும் 75 ஆயிரத்துக்கும் மேற்பட்ட இந்தியர்களை திருப்பி அழைத்து வரும் பணியில் இந்திய தூதரகம் தீவிரமாக ஈடுபட்டுள்ளது.

இந்தியா திரும்ப விரும்புபவர்கள், ரியாத்தில் உள்ள, இந்திய தூதரகத்தில் விண்ணப்பிக்கலாம் என, இந்திய அரசு சார்பில் அறிவிக்கப்பட்டிருந்தது. அவர்கள், இந்தியா திரும்ப வசதியாக, அவசர சான்றிதழ் வழங்க, மத்திய அரசு உத்தரவிட்டுள்ளது. சில நாட்களுக்கு முன், 15 ஆயிரம் பேர், தங்களுக்கு, அவசர சான்றிதழ் வேண்டும் என விண்ணப்பித்திருந்தனர். இன்னும் ஏராளமானோர் விண்ணப்பித்து வருவதால், முதற்கட்டமாக, 27 ஆயிரம் பேருக்கு, அவசர சான்றிதழ் வழங்க, இந்திய தூதரகம் முடிவு செய்துள்ளது.

இந்நிலையில், சவுதி அரேபியாவுக்கு அரசு முறை பயணமாக செல்லும் மத்திய வெளியுறவுத்துறை அமைச்சர் சல்மான் குர்ஷித், கூறுகையில், இந்த பிரச்னை தொடர்பாக, சவுதி வெளியுறவுத்துறை அமைச்சருடன் பேசுவதாக கூறியுள்ளார். மேலும் அவர், இந்தியர்களை தாயகம் கூட்டி வருவதற்கு உள்ள கால அவகாசம், சவாலானது. இருப்பினும், உள்ள கால அவகாசத்தில் நம்மால் முடிந்ததை செய்வோம் என கூறினார்.

தினமலர்