காந்தியும் சாந்தியும்

**ayyasamy ram** · **ayyasamy ram** Sat Jan 24, 2015 9:09 am

-
சாந்தி சாந்தி என்றே
சாந்தமாய் வாழ்வீர் என்றே
காந்தி யடிகள் அன்றே
கற்பித்தார் பாடம் நன்றே!

சாதி மதத்தால் என்றும்
சண்டைகள் வேண்டா மென்றார்
நீதியே அனைவ ருக்கும்
நிச்சயமாய் வேண்டு மென்றார்!

மற்றவர் துன்பங் கண்டு
மனமுருக வேண்டு மென்றார்
குற்றங் குறைகள் தன்னைக்
குறைத்திட வேண்டு மென்றார்!

ஒற்றுமை ஒன்றி னாலே
உயர்ந்திட முடியு மென்றார்
பற்றோடு வாழ்ந்தால் இந்தப்
பாரது செழிக்கு மென்றார்!

அவரவர் தெய்வந் தன்னை
அவரவர் வணங்க வேண்டும்
தவறாகும் ஒன்றை யொன்று
தர்க்கங்கள் செய்தால் என்றார்!

மதுவெனும் கொடிய நஞ்சை
மறந்திட வேண்டு மென்றார்
அது தரும் தீமை தன்னை
அகிலத்திற் கெடுத்துச் சொன்னார்!

-உதயை. மு.அழகிரிசாமி
சிறுவர் மணி