கோவை முதல் பெங்களூர் வரை டாய்லெட், சார்ஜர் வசதிகளுடன் ‘ப்ளை பஸ்’ சேவை துவக்கம்

கோவை: கோவை முதல் பெங்களூர் வரை டாய்லெட், சார்ஜர் உள்ளிட்ட வசதிகளுடன் ‘ப்ளை பஸ்’ சேவையை கர்நாடக அரசு அறிமுகம் செய்துள்ளது. கோவை காந்திபுரத்தில் உள்ள திருவள்ளூவர் பேருந்து நிலையத்தில் ‘ப்ளை பஸ்’ எனும் சொகுசு பேருந்து அறிமுக விழா நேற்று நடந்தது. கோவை மத்திய வட்டாரப் போக்குவரத்து கழக அலுவலர் உதயகுமார் கலந்துகொண்டு கொடியசைத்து பேருந்து பயணத்தை தொடங்கிவைத்தார். இதுகுறித்து கர்நாடக அரசு போக்குவரத்து கழக பொறுப்பாளர் ரவி கூறியதாவது: கர்நாடக மாநில அரசு போக்குவரத்து கழகம் சார்பில் கோவையில் இருந்து பெங்களூர் கெம்பேகவுடா சர்வதேச விமான நிலையத்திற்கு சேலம் வழியாக சொகுசு பேருந்து இயக்கப்படுகிறது. இதில் நவீன வெஸ்டர்ன் டாய்லெட், எல்இடி தொலைக்காட்சி, அனைத்து இருக்கைளிலும் மொபைல் சார்ஜர் வசதி, இலவச வைபை வசதி உள்ளன.
மேலும் பயணிகளுக்கு சுத்தமான குடிநீர், போர்த்திக் கொள்ள கம்பளம் உள்ளிட்டவை தரப்படும். நாள்தோறும் பெங்களூருவில் காலை 3 மணிக்கு புறப்படும் இந்த பேருந்து காலை 10.45 மணிக்கு கோவை வந்தடையும். பின்னர் மதியம் 12 மணிக்கு கோவையில் இருந்து புறப்பட்டு, இரவு 7.45 மணிக்கு பெங்களூர் சென்றடையும். பேருந்து கட்டணம் ரூ.1100. கோவை தமிழகத்தையும், கேரளாவையும் இணைக்கும் பகுதியாகும். தொழில் நிமித்தமாக ஏராளமானோர் கோவை வழியாக பெங்களூர் சென்று வருகின்றனர். அவர்கள் பயன்பெறும் வகையில் நவீன வசதிகளுடன் இந்த பேருந்து இயக்கப்படுகிறது. பயணிகள் www.ksrtc.in என்ற இணையதளத்திலும், 042224557585 என்ற தொலைபேசி எண்ணிலும் பதிவு செய்துகொள்ளலாம். தேவை இருக்கும்பட்சத்தில் பேருந்து எண்ணிக்கை அதிகரிக்கப்படும். இந்த பேருந்து தமிழகத்தில் முதல்முறையாக கோவையில்தான் அறிமுகப்படுத்தப்பட்டுள்ளது. இவ்வாறு அவர் கூறினார்.
நன்றி
தினகரன்