கோரிக்கை நிறைவேறியது! ரசிகர்களின் ஆதரவால் இந்திய அணி அபார வெற்றி

இந்திய கால்பந்து அணியின் கேப்டன் சுனில் சேத்ரி, ஒரு வீடியோவின் மூலம், போட்டியை பார்க்க வரும்படி ஒரு கோரிக்கை வைத்து சமூக வலைத்தளத்தில் வெளியிட்டார். இதன் காரணமாக ஒரே நாளில் 18 ஆயிரம் டிக்கெட்கள் விற்றுத் தீர்ந்தன.



இன்டர்கான்டினென்டல் கோப்பை கால்பந்து போட்டிகள் மும்பையில் நடக்கின்றன. சீனா டைபே, கென்யா, இந்தியா மற்றும் நியூசிலாந்து அணிகள் மோதிக்கொள்ளும் இந்தப் போட்டியில் கடந்த வெள்ளிக்கிழமை சீனா டைபேவை சந்தித்த இந்தியா 5-0 என்ற கோல் கணக்கில் சீனாவை வீழ்த்தியது.


நேற்று நடைபெற்ற போட்டியில் 3 கோல் அடித்து கென்யா அணியையும் வீழ்த்தியுள்ளது. ஜூன் 7 அன்று நடைபெறும் கடைசி ஆட்டத்தில் நியூசிலாந்து அணியுடன் மோதவுள்ளது.
இந்த போட்டியின்போது, உலக அளவில் விளையாடி வரும் வீரர்களில் அதிக கோல் அடித்தோர் பட்டியலில் மூன்றாவது இடத்தை, இந்திய அணியின் கேப்டன் சுனில் சேத்ரி பெற்றார். மேலும் கென்யாவுக்கு எதிராக நேற்று நடந்த ஆட்டம் சேத்ரிக்கு 100வது போட்டியாகும். இந்திய அளவில் 100 போட்டிகளில் பங்கேற்ற இரண்டாவது வீரராகிறார் சுனில் சேத்ரி.





கால்பந்து போட்டிகளை பார்க்க ரசிகர்கள் மைதானத்துக்கு வர வேண்டும். எங்களுக்காக குரல் கொடுங்கள், எங்களை திட்டுங்கள், சரியாக ஆடவில்லை என்றால் கோபப்படுங்கள், ஆனால், மைதானத்துக்கு வாருங்கள். இது வீரர்களுக்கு மிகப் பெரிய ஊக்கமாக இருக்கும் என்று சுனில் சேத்ரி வெளியிட்ட வீடியோவில் உருக்கமாக கூறியுள்ளார்.


அவருடைய இந்த கோரிக்கைக்கு ஆதரவாக கிரிக்கெட் வீரர்கள் சச்சின் டெண்டுல்கர், விராட் கோஹ்லி, சுரேஷ் ரெய்னா, டென்னில் வீராங்கனை சானியா மிர்ஸா என பலரும் ஆதரவு தெரிவித்திருந்தனர்.
வரும் ஜூன் 14 அன்று தொடங்கவிருக்கும் உலக கோப்பைக்காக கால்பந்து ரசிகர்கள் காத்திருக்கும் நிலையில், இந்தியாவின் இந்த வெற்றி இந்திய கால்பந்து ரசிகர்களை இன்னும் உற்சாகமாக்கியுள்ளது.
நன்றி
செய்தி புனல்