ஆழ்ந்த துாக்கமே ஆரோக்கிய ரகசியம்!

தன், 78 வயதிலும், ஆரோக்கியமாக இருப்பதன் ரகசியத்தை
சொல்லும், சென்னையின் பிரபலமான மருத்துவமனைகளில்
ஒன்றான, 'பிரன்டியர் லைப் லைன்' நிறுவனர்,
டாக்டர் கே.எம்.செரியன்:

என் பூர்வீகம், கேரள மாநிலம், பத்தனம்திட்டா மாவட்டத்தில் உள்ள
செங்கனுார். தினமும் நடைபயிற்சி மேற்கொள்வது, என் அன்றாட
கடமை.

வெளிநாடுகளுக்கு சென்றாலும், நடப்பதை விடுவதில்லை.
காலை எழுந்ததுமே இசை கேட்டபடியே, 45 நிமிடங்கள் நடப்பேன்.
இசையை கேட்டவாறே, அன்றைய பணிகளை திட்டமிடுவேன்.

தினமும், இசையுடன் அன்றைய நாளை துவக்குவதால், எவ்வித
குழப்பமும் இன்றி, அன்றைய பொழுது இனிதாக அமைகிறது.
இயல்பாகவே, குறைவாகவே தான் சாப்பிடுவேன். எனினும், காலை
உணவை நன்றாக சாப்பிட்டு விடுவேன்.

மதியம் சூப், காய்கறி, பழங்கள் சாலட் மட்டுமே சாப்பிடுவேன்.
இரவு, லைட்டான உணவு தான் சாப்பிடுவேன். உணவை குறைத்துக்
கொள்வதன் மூலம், உடலில் கொழுப்பு சேராமல் பார்த்துக்
கொள்கிறேன்.

மற்ற மாநிலத்தில் உள்ள அரிசியை விட, கேரளாவில் கிடைக்கும்
பெரிய அரிசி, சத்து நிறைந்தது; அது தான் எனக்கு பிடிக்கும். மீனை
விரும்பி சாப்பிடுவேன். கேரளாவின் நன்னீர் மீன்கள் எனக்கு
பிடிக்கும்.

அதுபோல, அனைத்து காய்கறிகளும் கலந்த அவியல் பிடித்தமானது.
வெளிநாடுகளுக்கு சென்றாலும், முடிந்த வரை, நல்ல உணவைத் தான்
எடுத்துக் கொள்வேன். வார இறுதியில், புதுச்சேரியில் உள்ள,
என், 'தி ஸ்டடி' பள்ளிக்கு செல்வேன். வெளிநாடுகளில் இருந்து வாங்கி
வந்த ஏராளமான மலர்ச் செடிகளை, அங்கு உள்ள அழகிய தோட்டத்தில்
வளர்க்கிறேன்.

அங்கு, என் நேரத்தை மகிழ்ச்சியாக செலவிடுவேன்.இரவில்,
படுக்கையில் சாய்ந்த உடன் துாங்கி விடுவேன். டாக்டர் என்பதால்,
சில நேரங்களில், நள்ளிரவில் கூட போன் வரும். அந்த அழைப்பை
எடுத்து பேசி விட்டு, மீண்டும் துாங்கி விடுவேன்.

துாக்கத்தை பொறுத்தவரை, எனக்கு எந்த குறைபாடும் இல்லை.
நல்ல துாக்கம் வேண்டும் என்றால், யாரைப் பற்றியும் கெட்ட சிந்தனை
கூடாது. ஒருவரைப் பற்றி தவறாக எண்ணுவதால், நமக்கு எந்த
நன்மையும் கிடைத்து விடப் போவதில்லை.

எனக்கு, 26 வயது இருக்கும் போது, ஆஸ்திரேலியா நாட்டில், முன் பின்
தெரியாதவர்கள் கூட எனக்கு, பல விதங்களில் உதவினர். அதை
இப்போதும் நினைத்து, பிறருக்கு உதவி செய்கிறேன். என்னை தேடி,
உதவி என வருவோருக்கு, அது நியாயமாக இருந்தால் செய்வேன்.

அது, மனதுக்கு அமைதியையும், நிறைவையும் கொடுக்கிறது.
இவை எல்லாமும் தான், என் ஆழ்ந்த துாக்கத்தை வழங்குகின்றன
என நினைக்கிறேன்!
-
-------------------------------
நன்றி -தினமலர்