அ.தி.மு.க.,வில் குழப்பம் நீடிப்பு: எம்.எல்.ஏ.,க்கள் சென்னை வர உத்தரவு

சென்னை:
முதல்வர் வேட்பாளர் யார் என்பதில், முதல்வர் பழனிசாமி -
துணை முதல்வர் பன்னீர் செல்வம் இடையே மோதல்
ஏற்பட்டுள்ள நிலையில், அ.தி.மு.க., எம்.எல்.ஏ.,க்கள் அனைவரும்
வரும் 6ம் தேதி சென்னை வர உத்தரவு பிறப்பிக்கப்பட்டுள்ளது.

வரும் சட்டசபை தேர்தலில் முதல்வர் வேட்பாளர் யார் என்பதில்
முதல்வர் பழனிசாமி - துணை முதல்வர் பன்னீர்செல்வம் இடையே,
அ.தி.மு.க., செயற்குழுவில் பகிரங்க மோதல் வெடித்தது.

அ.தி.மு.க.,வின் முதல்வர் வேட்பாளர் யார் என்பதை வரும் 7ம் தேதி
முதல்வரும், துணை முதல்வரும் இணைந்து அறிவிப்பார்கள் என
செயற்குழு கூட்டம் முடிந்த பின்னர் அறிவிக்கப்பட்டது.

இது தொடர்பான பேச்சின் போது, வழிகாட்டுதல் குழு அமைத்த
பின்னர், முதல்வர் வேட்பாளரை அறிவிக்கலாம் என பன்னீர்செல்வம்
தரப்பினர் வலியுறுத்தினர். ஆனால், இதனை முதல்வர் தரப்பு ஏற்க
மறுத்தது. இரு தரப்பும் தங்கள் நிலையில் இருந்து இறங்கி வர
மறுப்பதால், முதல்வர் வேட்பாளரை முடிவு செய்வதில் இழுபறி
ஏற்பட்டுள்ளது.

பிரச்னைக்கு தீர்வு காண, பழனிசாமியும், பன்னீர்செல்வமும் நாளை
நேரில் சந்தித்து பேச உள்ளதாக தகவல்கள் வெளியாகியுள்ளன.

இந்நிலையில், அ.தி.மு.க., எம்.எல்.ஏ.,க்கள் அனைவரும் வரும் 6 ம் தேதி
சென்னைக்கு வர வேண்டும் என கட்சி தலைமை உத்தரவிடப்பட்டுள்ளது.
முதல்வர் வேட்பாளர் யார் என்பது குறித்து 7 ம் தேதி அறிவிக்கப்படலாம்
எனக்கூறப்படும் நிலையில், அது குறித்து எம்.எல்.ஏ.,க்களுடன் ஆலோசனை
நடத்தப்படலாம் எனக்கூறப்படுகிறது.

இதனிடையே முதல்வர் பழனிசாமியை, சட்டத்துறை அமைச்சர் சண்முகம்
அவரது இல்லத்தில் சந்தித்து ஆலோசனை நடத்தினார்.

மேலும் முன்னாள் சபாநாயகர் தம்பித்துரை பன்னீர்செல்வத்தை சந்தித்து
ஒரு மணி நேரம் ஆலோசனை நடத்தினார். இதற்கிடையில் பன்னீர்செல்வம்
இன்று தனது சொந்த ஊரான தேனிக்கு கிளம்ப உள்ளதாக கூறப்படுகிறது.

இதனால் நாளை முதல்வர், துணைமுதல்வர் சந்திப்பு நடக்குமா என்பது
சந்தேகமே !

பன்னீர் - தம்பிதுரை பேச்சு பின்னணி என்ன?

இருவரும் பேசிக்கொண்டதன் தகவல்கள் குறித்து
நம்பத்தகுந்த வட்டாரங்கள் கூறியதாவது;

*11 பேர் கொண்ட வழிக்காட்டுதல் குழு உடனே நியமிக்க வேண்டும்.
அக்குழுவில் பழனி சாமி ஆதரவாளர்கள் 6 பேர் நியமிக்க வேண்டும்.
பன்னீர்செல்வம் ஆதரவாளர்கள் 5 பேர் நியமிக்க வேண்டும்.

இந்தக் குழுவில் வன்னியர், தலித், நாடார் என் அனைத்து சமுதாய
பிரிவினர் இடம் பெற வேண்டும்.

*கூட்டணி பேச்சு, தொகுதிகள் பங்கீடு, வேட்பாளர் பட்டியல் தேர்வு
போன்ற பணிகளை வழிகாட்டுதல் குழு மேற்கொள்ள வேண்டும்.

*கட்சி நிர்வாகிகள் நியமனம் மற்றும் வேட்பாளர் பட்டியலில்
பழனிசாமி ஆதரவாளர்களுக்கு 55சதவீதம் , பன்னீர்செல்வம்
ஆதரவாளர்களுக்கு 45 சதவீதம் ஒதுக்கீடு செய்ய வேண்டும்.

இந்த நிபந்தனைகளை ஏற்றுக் கொண்டால் முதல்வர் வேட்பாளர்
பழனிச்சாமி அறிவிக்க தயார் என பன்னீர்செல்வம் தரப்பில் பேச்சு
நடத்த பட்டுள்ளது.இவ்வாறு அந்த வட்டாரங்கள் தெரிவித்தன.
-
தினமலர்