யஷ்வந்த் சின்ஹா --கோபம்.

புதுடில்லி: வரும் 21ல் நடக்கவிருக்கும் ஜனாதிபதி தேர்தலில், எதிர்க்கட்சிகளின் வேட்பாளராக நிறுத்தப்பட்டுள்ளவர் யஷ்வந்த் சின்ஹா. இவர் முதலில் பா.ஜ., அமைச்சரவையில் நிதி அமைச்சராக இருந்து, பின் கட்சியிலிருந்து விலகி திரிணமுல் காங்கிரசில் சேர்ந்தார். அங்கு தேசிய துணைத் தலைவராக பதவி வகித்தார். ஜனாதிபதி தேர்தலில் தே.ஜ., கூட்டணி வேட்பாளர் திரவுபதி முர்முவை எதிர்த்து போட்டியிட, கட்சிப் பதவியை யஷ்வந்த் ராஜினாமா செய்தார்.

இவரை வேட்பாளராக்க அதிக முயற்சிகள் எடுத்தவர் மேற்கு வங்க முதல்வரும், திரிணமுல் காங்., தலைவருமான மம்தா பானர்ஜி. ஆனால், மம்தா மீது யஷ்வந்த் படு கோபத்தில் உள்ளார்.காரணம், திரிணமுல் எம்.எல்.ஏ.,க்கள் மற்றும் எம்.பி.,க்கள் முர்முவுக்கு ஓட்டளித்து விடுவரோ என்கிற சந்தேகம் ஒரு பக்கம். இன்னொரு பக்கம் மம்தா போட்ட உத்தரவு. 'நீங்கள் மேற்கு வங்கத்தில் பிரசாரத்திற்கு வர வேண்டாம்; நானே பார்த்துக் கொள்கிறேன்' என யஷ்வந்தின் பிரசாரத்திற்கு மம்தா தன் மாநிலத்தில் தடை போட்டுவிட்டார்.

யஷ்வந்த் தான் வேட்பாளர் என எதிர்க்கட்சிகளை சம்மதிக்க வைத்த மம்தா, இப்போது பின்வாங்க, மேற்கு வங்க ஓட்டு வங்கி தான் காரணம் என சொல்லப்படுகிறது.திரவுபதி முர்மு பழங்குடி இனத்தைச் சேர்ந்தவர். மேற்கு வங்கத்தில் இந்த பழங்குடியினரின் ஓட்டுகள் 53 லட்சம், அதாவது மாநில மக்கள் தொகையில் 6 சதவீதமாக உள்ளது. திரவுபதிக்கு எதிராக, யஷ்வந்திற்கு ஆதரவாக பிரசாரம் செய்தால், தன் கட்சிக்கு பழங்குடியினர் ஓட்டுகள் கிடைக்காது என அஞ்சுகிறாராம் மம்தா.

அதனால் தான் அவரை தன் மாநிலத்தில் ஓரம் கட்டிவிட்டார் என சொல்லப்படுகிறது.'சும்மா இருந்த என்னை நீ தான் வேட்பாளர் என உசுப்பேற்றிவிட்டு, மம்தா இப்போது இப்படி செய்துவிட்டாரே' என தனக்கு நெருக்கமானவர்களிடம் கோபமாக சொல்லி வருகிறாராம் யஷ்வந்த். 'எப்படியும் வெற்றி பெறப் போவது திரவுபதி தான்; அப்படியிருக்க எதற்கு எந்த வீண் கவுரவம்' என பா.ஜ., தலைவர்கள் யஷ்வந்தை கிண்டலடிக்கின்றனர்.

இந்நிலையில், தேசியவாத காங்., தலைவர் சரத் பவார், சிவசேனா தலைவர் உத்தவ் தாக்கரே இருவரும், இனி மம்தாவை நம்பி எந்த விஷயத்திலும் களம் இறங்கக் கூடாது என வருத்தப்படுகின்றனர்.

நன்றி தினமலர்.

எதிர்ப்பு தெரிவிக்கும் வகையில் இவர் ஆதரவு தேட
எல்லா மாநிலங்களுக்கும் போகக்கூடாது.
அனுபவித்தது போதுமென உட்காரவேண்டியதுதான்.
அது ஒரு நல்ல பாடமாக அமையும்.