44 டாடா மேஜிக் வாகனங்கள் பறிமுதல்

சென்னை : போக்குவரத்து அதிகாரிகள் நடத்திய அதிரடி சோதனையில் 44 டாடா மேஜிக் வாகனங்கள் பறிமுதல் செய்யப்பட்டன. சென்னையில் ஆட்டோ, ஷேர் ஆட்டோ போன்று 400க்கும் மேற்பட்ட டாடா மேஜிக் வாகனம் இயக்கப்படுகிறது. சென்னையில் பயணிகளை ஏற்றி செல்லும் டிக்கெட் வாகனமாக இயக்க டாடா மேஜிக் வாகனத்திற்கு முறைப்படி அனுமதி வழங்கப்படவில்லை. சுற்றுலா வாகனமாக இயக்க மட்டுமே அனுமதி அளிக்கப்பட்டுள்ளது.இதனால் ஆட்டோ மற்றும் ஷேர் ஆட்டோ ஓட்டுநர்களுக்கு பெரும் இழப்பு ஏற்பட்டுள்ளது. இதை கண்டித்து ஆட்டோ தொழிற்சங்கங்கள் பல்வேறு போராட்டங்களை நடத்தின. பின்னர் சென்னை உயர்நீதி மன்றத்தில் வழக்கு தொடரப்பட்டது. வழக்கை விசாரித்த நீதிமன்றம் சென்னையில் டாடா மேஜிக் வாகனங்களை, ஷேர் ஆட்டோவாக ஓட்ட தடைவிதித்தது. இதையும் மீறி சென்னையில் டாடா மேஜிக் வாகனத்தை, ஷேர் ஆட்டோவாக இயக்குபவர்கள் மீது சட்டப்படி நடவடிக்கை எடுக்கப்படும் என போக்குவரத்து துறை எச்சரித்தது.இது குறித்து கே.கே.நகர் வட்டார போக்குவரத்து அலுவலர் கார்த்தலிங்கன் நேற்று வெளியிட்ட அறிக்கை:போக்குவரத்து ஆணையரின் உத்தரவுப்படி கடந்த சில மாதங்களில் 44 டாடா மேஜிக் வாகனங்கள் சிறைப்பிடிக்கப்பட்டுள்ளது. அதிகபட்ச தண்டம் மற்றும் இணக்க கட்டணமாக க்ஷீ1,85,900 வசூலிக்கப்பட்டது. நேற்று மட்டும் 9 டாடா மேஜிக் வாகனங்கள் சிறைப்பிடிக்கப்பட்டன. ஷேர் ஆட்டோவாக இயக்க டாடா மேஜிக் வாகனத்திற்கு அனுமதி வழங்கப்படவில்லை. கடந்த மார்ச் முதல் செப்டம்பர் மாதம் வரை 5 வாகனங்களுக்கு மட்டுமே உரிய உறுதி மொழி பத்திரம் அளித்து பதிவு செய்யப்பட்டுள்ளது.