ரவா பொங்கல் - கதையும், செய்முறையும்

சின்ன
வயதில் இருந்து அடிக்கடி சினிமா படங்களில் "ரவா பொங்கல்" என ஒரு உணவை
பற்றி வருமே அது என்னாவாயிருக்கும் என அடிக்கடி என்னை நானே கேள்வி
கேட்டிருக்கேன். நாமல்லாம் கேள்வி கேட்க ஆரம்பிப்பதே கதைகளை
படித்தோ/பார்த்தோ தானே! ஏன் என்றால் இதற்கு முன்னாடி "முதல்வன்" படம்
வெளியான நேரம், வீட்டில் இல்லாதா பொல்லாத ரகளை பண்ணி "உப்பு கருவாடும் ஊற
வச்ச சோறும்" சாப்பிட்டிருக்கோம். ஆக இந்த ரவா பொங்கலையும் ஒரு கை
பார்ப்பது என இணையத்தில் உலாவி, பல செய்முறைகளை பார்த்து, படித்து:
இறுதியில் என்னிடம் மாட்டிய ராவா பொங்கலின் கதை தான் இனி வர போகுது.

தூயாவின் "ரவா பொங்கல்"

நடிகர்கள்:

ரவா - 1 கப்
பயறு - 3 மே.க
இஞ்சி விழுது - 1 தே.க
சீரகப்பொடி - 1/2 தே.க
மிளகுப்பொடி - 1/2 தே.க
கறிவேப்பிலை - 10 இலைகள்
பொரித்த முந்திரி பருப்பு - 5


இனி காட்சி அமைப்பு:

1. ரவையையும், பயறையும் தனித்தனியாக பதமாக வறுத்து எடுத்துக்கொள்ளவும்.
2. வறுத்த பயறை நன்றாக வேக வைத்து எடுத்துக்கொள்ளுங்கள்.
3.
ஒரு சட்டியில் இஞ்சி, பொடிகள், கறிவேப்பிலையை போட்டு அரை நிமிடத்திற்கு
வறுத்த பின்னர், அதில் ரவையை சேர்த்து மேலும் அரை நிமிடத்திற்கு
வறுக்கவும்.
4. இப்பொழுது வேக வைத்த பயறு, உப்புடன் 1 கப் வெந்நீரை
சேர்த்து கிளற வேண்டும். நன்றாக கிளறிய பின்னர், சட்டியை மூடி 5
நிமிடங்களுக்கு மெதுவான வெப்பத்தில் வைக்கவும்.
5. ஐந்து நிமிடத்தில் அடுப்பில் இருந்து இறக்கிய பின்னர் பொரித்த முந்திரிப்பருப்பும், நெய்யும் சேர்த்துக்கலாம்.


கூட சேர்த்துக்க:
- உங்களுக்கு தெரிந்த சட்னியுடன் சாப்பிடுங்க.


சண்டைக்காட்சிகள்:
- வறுக்கும் போதோ, வேக வைக்கும் போதோ உங்களோட கையை பாத்திரத்திடமிருந்து பத்திரமாக பார்த்துக்கொள்ளவும்.
- வறுத்த பயறை உடனே வாயில் போடுவதை தவிர்க்கவும்
- முடிந்தால் சமைத்த உணவை நீங்களே சாப்பிட வேண்டாம்.

எடிட்டிங்:
- நெய்யை தவிர்க்கலாம்.
- பயறு அதிகம் சேர்த்துக்கலாம்

நன்றி
வணக்கம்


இது ஒரு "தூயா" தயாரிப்பு

நன்றி : தூயா கிச்சன் வலை பூவில் இருந்து மீள் பதிவு