ஆன்லைன் வர்த்தகத்தை அரசு தடை செய்ய வேண்டும்: ஜி.ராமகிருஷ்ணன்!!!

விலைவாசி உயர்வுக்கு அடிப்படைக் காரணமாகவுள்ள ஆன்லைன் வர்த்தகத்தை அரசு தடை செய்ய வேண்டும் என, மார்க்சிஸ்ட் கம்யூனிஸ்ட் கட்சியின் மாநிலச் செயலாளர் ஜி.ராமகிருஷ்ணன் கூறினார்.


ராமநாதபுரத்தில் செய்தியாளர்களிடம் பேசிய அவர்,


பெட்ரோல் விலையை முதலாளிகளே நிர்ணயித்துக் கொள்ளலாம் என அரசு அறிவித்ததால், கடந்த 6 மாதத்தில் 7 முறை பெட்ரோல் விலை உயர்ந்திருக்கிறது. இதே போல மண்ணெண்ணெய், டீசல், சமையல் எரிவாயு ஆகியவற்றின் விலையையும் உற்பத்தியாளர்களே முடிவு செய்து கொள்ளலாம் என அரசு அறிவிக்க இருக்கிறது.


வரும் சட்டப் பேரவைத் தேர்தலுக்குப் பிறகு இவற்றின் விலையை உயர்த்த மத்திய அரசு திட்டமிட்டுள்ளது. ஒரு லிட்டர் பெட்ரோல் கச்சா எண்ணெய் ரூ.25 க்கு வாங்கி ரூ.40 வரை விற்பனை செய்யப்படுகிறது.


நாட்டில் விலைவாசி உயர்வும், வரலாறு காணாத தொடர் ஊழல் நிகழ்வுகளும் பொதுமக்களை வெகுவாகப் பாதித்துள்ளது. விலைவாசி உயர்வுக்கு அடிப்படைக் காரணமாகவுள்ள ஆன்லைன் வர்த்தகத்தை அரசு தடை செய்ய வேண்டும்.


பருத்திக்கு பற்றாக்குறை நிலவும் நேரத்தில், ஏற்றுமதியை அரசு தடை செய்ய வேண்டும். பருத்தி ஏற்றுமதியால் கரூர், சேலம், நாமக்கல், திருப்பூர் போன்ற மாவட்டங்கள் கடுமையான பாதிப்புக்கு உள்ளாகியிருக்கின்றன. எனவே அரசே பருத்தியை கொள்முதல் செய்ய வேண்டும்.


கள்ளச் சாராயம் காய்ச்சுவோர், கந்து வட்டித் தொழில் செய்வோர், மணல் கொள்ளையடிப்போர், கட்டப் பஞ்சாயத்து பேசுவோர் என தமிழகத்தில் மிக அதிகமாக சமூக விரோதச் செயல்களில் ஈடுபட்டு வருகின்றனர்.

இது குறித்து தகுந்த ஆதாரங்களோடும், சாட்சிகளோடும் காவல் துறைத்

தலைவரிடம் மனு கொடுத்தும் எவ்வித பலனுமில்லை. சட்டம் ஒழுங்கு முழுமையாக கெட்டு விட்டது. கட்சியின் திருவாரூர் மாவட்ட செயற்குழு உறுப்பினர் நாவலன், கள்ளச் சாராய கும்பலால் கொலை செய்யப்பட்ட வழக்கில் முக்கிய குற்றவாளியான பன்னீர்செல்வம் இதுவரை கைது செய்யப்படவில்லை.

இதுவரை அவர் மீது 53 குற்ற வழக்குகள் பதிவு செய்யப்பட்டும், ஆளும் கட்சிக்காரராக இருப்பதால் அவரை கைது செய்வதில் போலீஸ் அலட்சியம் காட்டுகிறது. அவரை கைது செய்ய வலியுறுத்தி இம்மாதம் 28 ஆம் தேதி திருவாரூர் மாவட்ட ஆட்சியர் அலுவலகம் முன்பு கட்சியின் சார்பில் எனது தலைமையில் ஆர்ப்பாட்டம் நடத்தப்படும்.

தமிழக மீனவர்கள் இலங்கை ராணுவத்தினரால் தாக்கப்படாமல் இருக்க, இரு நாட்டு ராணுவமும் இணைந்து கூட்டு ரோந்துப் பணியில் ஈடுபடலாம் என்றார்.

நக்கீரன்