அன்னா ஹசாரேக்கு சோனியா வேண்டுகோள்

ஸ்ரீமதி வேலன் · 08/02/2011

புதுடெல்லி, ஏப். 8-

'உண்ணாவிரதத்தை கைவிடுங்கள்' என்று, அன்னா ஹசாரேக்கு, சோனியா காந்தி வேண்டுகோள் விடுத்து இருக்கிறார்.

ஊழலுக்கு எதிரான லோக்பால் மசோதாவை உடனே மத்திய அரசு நிறைவேற்ற வேண்டும் என்று கோரி, 71 வயதான சமூக சேவகர் அன்னா ஹசாரே டெல்லியில் கடந்த 6-ந்தேதி, சாகும்வரை உண்ணாவிரதத்தை தொடங்கினார். அவரது உண்ணாவிரதம் இன்று 4-வது நாளாக நீடிக்கிறது.

அவருடைய உண்ணாவிரதத்துக்கு சமூக ஆர்வலர்களும், சேவை அமைப்புகளும் ஆதரவு கொடுத்து வருகின்றன.

ஹசாரே தனது உண்ணாவிரதத்தை நிறுத்திக்கொள்ள வேண்டும் என்று, காங்கிரஸ் தலைவர் சோனியா காந்தி வேண்டுகோள் விடுத்தார். இது குறித்து அவர் வெளியிட்டுள்ள அறிக்கையில் கூறி இருப்பதாவது:-

பொது வாழ்வில் ஊழலை ஒழிக்க வேண்டும். ஊழல் மீது கடும் நடவடிக்கை எடுக்க வேண்டும் என்பதில் எங்களுக்கு மாற்று கருத்து கிடையாது. இரண்டுவிதமான கருத்துக்களும் இல்லை.

இந்த பிரச்சினையில் நான் முழு கவனம் செலுத்தி, தேவையான ஆக்கபூர்வமான, சட்டபூர்வமான நடவடிக்கைகளை மேற்கொள்வேன். எனவே ஹசாரே தனது உண்ணாவிரதத்தை முடித்துக்கொள்ள வேண்டும். இவ்வாறு சோனியா கூறி இருக்கிறார்.

இந்த நிலையில் லோக்பால் மசோதா பற்றி ஆராய கூட்டு கமிட்டி ஒன்றை அமைக்க மத்திய அரசு முடிவு செய்து இருக்கிறது. இந்த கமிட்டி, லோக்பால் மசோதாவில் கூடுதலாக என்னென்ன அம்சங்களை சேர்க்கலாம் என்பது பற்றி ஆராயும். இதற்கிடையில், 'எனது கோரிக்கைகள் நிறைவேறும் வரை உண்ணாவிரதத்தை நிறுத்த மாட்டேன்' என்று, ஹசாரே அறிவித்து இருக்கிறார்.