தமிழக மக்களுக்கு சுமையை அதிகரிக்கும் எந்த நடவடிக்கைகளையும் அரசு எடுக்காது:

முதலமைச்சர் ஜெயலலிதா பேட்டி



சென்னை, ஜூன் 1- முதலமைச்சர் ஜெயலலிதா கோட்டையில் இன்று செய்தியாளர்களுக்கு பேட்டி அளித்தார். அதன் விவரம் வருமாறு:-

கேள்வி:- தனியார் கல்வி நிறுவனங்கள் கட்டணத்தை உயர்த்தி விட்டதாக புகார் கூறப்படுகிறதே?

பதில்:- அரசு இதில் தானாக தலையிட முடியாது. புகார் தந்தால் நடவடிக்கை எடுக்கப்படும்.

கேள்வி:- தனியார் பள்ளிகள் கல்வி கட்டணத்தை உயர்த்தி விட்டதாக சிலர் போராட்டம் நடத்தி வருகிறார்களே?

பதில்:- போராட்டம் நடத்த வேண்டிய அவசியமில்லை. பெற்றோர் ஆதாரத்துடன் புகார் செய்தாலோ, பள்ளி நிருவாகம் முறையிட்டாலோ அரசு நிருவாகம் தலையிட்டு பிரச்சினையை சுமூகமாக தீர்த்து வைக்கும்.

கேள்வி:- இலவச அரிசி வழங்கும் திட்ட தொடக்க விழா இன்று எளிமையாக நடந்தது. மற்ற அரசு விழாக்களும் இதுபோல் நடக்குமா?

பதில்:- அனைத்து அரசு விழாக்களும் இதுபோல எளிமையாகத்தான் நடக்கும். வீண்-ஆடம்பரமாக செலவு செய்து அரசு விழாக்களை நடத்தக்கூடாது என்பது இந்த அரசின் கொள்கை. அடுத்து தொடரும் திட்டங்களுக்கான விழாவும் இதுபோல் எளிமையாக நடைபெறும்.

கேள்வி:- புதுவையில் உள்ள நியாயவிலைக் கடைகளில் 11- ஆம் தேதி முதல் 31- ஆம் தேதி வரை எந்த நியாயவிலைப் பொருள்களையும் வாங்கலாம் என்ற நிலை உள்ளது. தமிழ்நாட்டிலும் அந்த நிலை வருமா?

பதில்:- தமிழ்நாட்டிலும் இனி எல்லா பொருள்களையும், நியாயவிலைக் கடைகளில் எப்போதும் வாங்கலாம். பொருள்களை பதுக்கி வைக்கும் நிலை இனி இருக்காது. கேள்வி:- டி.ஜி.பி. நடராஜிக்கு பதவி வழங்கவேண்டும் என்று மத்திய நிர்வாக தீர்ப்பாயம் ஆணையிட்டுள்ளதே?

பதில்:- நேற்றுதான் தீர்ப்பு வந்துள்ளது. அதுபற்றி அரசு பரிசீலித்து வருகிறது. ஆலோசித்து முடிவு எடுக்கப்படும்.

கேள்வி:- மின் வாரியத்துக்கு கடன் சுமை அதிகமாக இருப்பதாக கூறப்படுகிறது. எனவே மின்சார கட்டணம் உயருமா?

பதில்:- அப்படி எந்த எண்ணமும் இல்லை. தமிழக மக்களுக்கு சுமையை அதிகரிக்கும் எந்த நடவடிக்கையும் அரசு எடுக்காது. 2001- இல் அ.தி.மு.க. ஆட்சி நடந்தபோது மின் தடை இல்லை. எல்லா நேரமும் மின்சாரம் இருந்தது. அப்போது 10,111 மெகாவாட் மின்சாரம் உற்பத்தியானது. பின்னர் வந்த அரசின் தவறான நிருவாகத்தாலும், மின் உற்பத்தி மய்யங்களை சரியாக பராமரிக்காததாலும் மின் உற்பத்தி பாதிக்கப்பட்டது. தரமற்ற நிலக்கரிகளை அனல்மின் நிலையங்களுக்கு வெளிநாட்டில் இருந்து இறக்குமதி செய்ததும் மின் உற்பத்தி பாதிப்புக்கு காரணம். இந்த நிலைமையை மாற்றும் முயற்சியில் ஈடுபட்டு உள்ளோம். விரைவான நடவடிக்கையால் மின் உற்பத்தி அதிகரித்து வருகிறது. தேர்தல் அறிக்கையில் குறிப்பிட்டப்படி கூடுதலாக 5000 மெகாவாட் மின்சாரத்தை அதிகமாக உற்பத்தி செய்ய நடவடிக்கை எடுத்து வருகிறது.

கேள்வி:-- கடந்த ஆட்சியில் கொண்டு வரப்பட்ட இலவச தொலைக்காட்சி இலவச வீடு திட்டம் தொடருமா?

பதில்:- ஆளுநர் உரையில் தெரிந்து கொள்ளலாம்.

கேள்வி:- அரசு கஜானா திருப்தியாக இருக்கிறதா?

பதில்:- அதை இப்போது சொல்ல இயலாது. அது பற்றிய விவரத்தை ஆளுநர் உரையிலும், மீதியை பட்ஜெட்டிலும் சொல்லுவோம்.

கேள்வி:- அண்ணா பல்கலைக் கழகங்கள் ஒன்றாக இணைக்கப்படுமா?

பதில்:- ஆளுநர் உரையில் அதற்கான பதில் தெரியும்.

- இவ்வாறு முதல்-அமைச்சர் ஜெயலலிதா கூறினார்.


விடுதலை