ஐந்து முகத்துடன் ஆறுமுகன்!

**சிவா** · **சிவா** Mon Jun 27, 2011 8:57 am

சிவமைந்தனான முருகப்பெருமான் சில தலங்களில் வித்தியாசமான திருக்கோலத்துடன் காட்சியளிக்கிறார். அவற்றுள் சில...

* கரூர் வெங்கமேடு மலையில் முருகன் வேல், மயில், வள்ளி, தெய்வானை இல்லாமல் தனியாகக் காட்சி தருகிறார்.

* திருச்செந்தூர் ஆவணித் திருவிழாவின் போது தங்கப் பல்லக்கில் முருகன் நடராஜர் கோலத்தில் பவனி வருவார்.

* மேட்டுப்பாளையம் அருகேயுள்ள ஓதிமலையில் ஐந்து முகம், எட்டுக் கைகளுடன் முருகன் அருள்பாலிக்கிறார்.

* திருவொற்றியூரில் தோகை விரித்த மயிலின் மீது அமர்ந்துள்ள முருகனைக் காணலாம்.

* குமரக்கோட்டத்தில் உற்சவ முருகரின் தலைக்கு மேல் ஐந்து தலைப்பாம்பு குடையாக உள்ளது.

* பெரம்பலூர் செட்டிக்குளத்தில் கையில் கரும்புடன் முருகன் அருள்பாலிக்கிறார்.

* மயில் வாகனத்தை விட்டிறங்கி அதன் முன்பு நிற்கிற நிலையில் தலைமலைக்காட்டில் முருகன் காட்சியளிக்கின்றார்.

* முருகன் மீன் மீது இருக்கும் கோலத்தை காங்கேயம் ஐயப்பன் கோயிலில் காணலாம்.

* மந்திரகிரி முருகன் சேவலைக் கையில் ஏந்தியுள்ளார்.

* மருதமலையில் குதிரை மீது முருகன் அமர்ந்திருக்கிறார்.

* திருக்குறுங்குடியில் முருகனுக்கு மூன்று கண்கள் உள்ளன.

* திண்டுக்கல், சின்னாளப்பட்டி, சென்னிமலை ஆகிய தலங்களில் நான்முக முருகன் அருள்பாலிக்கிறார்.

- நெ. இராமன்