மாலைமலர்- கற்பக வினாயகா இணைந்து நடத்தும் பிளஸ்-2 மாதிரி தேர்வு

சென்னை, டிச 17-

உயர் படிப்பிற்கு பிளஸ்-2 மதிப்பெண் அடிப்படையாக இருப்பதால் 12-ம் வகுப்பு பொதுத்தேர்வில் மாணவ- மாணவிகள் அதிக கவனம் செலுத்துகிறார்கள். மருத்துவம், என்ஜினீயரிங் போன்ற படிப்பில் சேர குறைந்த பட்சம் 0.25 கட்-ஆப் மார்க் கிடைக்காததால் பல மாணவ- மாணவிகளுக்கு வாய்ப்பு கிடைக்காமல் போய் விடுகிறது.

அதனால் ஒவ்வொரு மதிப்பெண்ணும் முக்கியமாக கருதப்படுகிறது. அதனால் மாணவ- மாணவிகள் அதிக மதிப்பெண் பெற மாலைமலரும், கற்பக வினாயகா என்ஜினீயரிங் கல்லூரியும் இணைந்து பிளஸ்-2 மாதிரி தேர்வை நடத்துகிறது. மாணவர்களின் தேர்வு பயத்தை நீக்கி மன அழுத்தத்தை போக்கும் வகையில் இத்தேர்வு அமைகிறது.

ஜனவரி மாதம் 7 மற்றும் 8-ந்தேதி ஆகிய 2 நாட்கள் மாதிரி தேர்வு மதுராந்தகத்தை அடுத்த சின்ன கொளப்பாக்கத்ததில் உள்ள கற்பக விநாயகா என்ஜினீயரிங் கல்லூரி வளாகத்தில் நடைபெறுகிறது. 7-ந்தேதி காலையில் இயற்பியல் தேர்வும், பிற்பகல் வேதியியல் தேர்வும் 8-ந்தேதி காலையில் கணிதம் மற்றும் தாவரவியல் தேர்வும் பிற்பகலில் உயிரியல் மற்றும் விலங்கியல் தேர்வும் நடக்கிறது.

மாநில பாட வாரியத்தில் பிளஸ்-2 ஆங்கிலம் வழியில் படிக்கின்ற மாணவ- மாணவிகள் இந்த மாதிரி தேர்வு எழுத விண்ணப்பிக்கலாம். பள்ளியில் இருந்து மாணவ- மாணவிகளை அழைத்து செல்ல போக்குவரத்து வசதியும், உணவும், இலவசமாக வழங்கப்படுகிறது. மாதிரி தேர்வில் முதல் மதிப்பெண் பெறும் மாணவருக்கு இந்தக்கல்லூரியில் இலவச கல்வி அளிக்கப்படுகிறது.

4 ஆண்டுகள் என்ஜினீயரிங் படிப்பிற்கான முழு செலவையும் கல்லூரி ஏற்றுக்கொள்கிறது. 20 மாணவர்களுக்கு பரிசுகளும் வழங்கப்படுகின்றன. இதில் பங்கேற்கும் மாணவர்களுக்கு கேள்வித்தாள் அடங்கிய புத்தகம் ஒன்றும் இலவசமாக கொடுக்கப்படுகிறது. அனுபவமிக்க ஆசிரியர்களை கொண்டு வினாத்தாள் தயாரிக்கப்பட்டு மாதிரிதேர்வு நடத்தப்படுகின்றது.

அதனால் இந்த அரிய வாய்ப்பை பிளஸ்-2 மாணவர்கள் பயன்படுத்தி கொள்ளலாம். தேர்வில் பங்கேற்க விரும்பும் மாணவ- மாணவிகள் Register @ www.kvcct.in இணையதளம் வழியாகவும், 044-27565486, 9865224289, 9791143733, 9443330343 ஆகிய போன்கள் மூலம் தொடர்பு கொண்டு பதிவு செய்து கொள்ளலாம். பிளஸ்-2 விசேஷ தேர்வு பற்றி மாலைமலரில் செய்தி வெளியானதை அறிந்த மாணவர்கள் ஏராளமான இணைய தளம் மூலமும், டெலிபோன் மூலமும் மாதிரி பரீட்சை எழுத பதிவு செய்தனர்.

சுமார் 300-க்கும் மேற்பட்டவர்கள் இதுவரை பதிவு செய்து உள்ளனர். சென்னை, திருவள்ளூர், காஞ்சீபுரம் மாவட்டங்களில் இருந்து ஏராளமான பெற்றோர்களும், மாணவர்களும் நேரிலும் விண்ணப்பித்து வருகிறார்கள்.

மாலைமலர்