எஸ்.எம்.எஸ்., மூலம் பதில் அனுப்பியது அம்பலம் : தி.மலையில் மேலும் ஒரு ஆசிரியர் சஸ்பெண்ட்

திருவண்ணாமலை, மவுன்ட் செயின்ட் ஜோசப் பள்ளியில், மாணவர்களுக்கு, "பிட்' வழங்கிய விவகாரத்தில், ஏற்கனவே ஏழு ஆசிரியர்கள் சஸ்பெண்ட் செய்யப்பட்ட நிலையில், எஸ்.எம்.எஸ்., மூலம் விடை வழங்கிய, மேலும் ஒரு ஆசிரியர் சஸ்பெண்ட் செய்யப்பட்டார். திருவண்ணாமலை, மவுன்ட் செயின்ட் ஜோசப் பள்ளியில், 16ம் தேதி, கலெக்டர் அன்சுல் மிஸ்ரா நேரடியாக ஆய்வு நடத்திய போது, எஸ்.எஸ்.எல்.சி., தேர்வு எழுதிக் கொண்டிருந்த மாணவர்களுக்கு, "பிட்' தயார் செய்து, பள்ளியில் ஜெராக்ஸ் போட்டு மாணவர்களுக்கு வினியோகம் செய்த ஆசிரியர்கள் ஏழு பேர், ஏற்கனவே சஸ்பெண்ட் செய்யப்பட்டனர். பள்ளி தலைமை ஆசிரியர் சவுமியா மற்றும் பள்ளியில் பணிபுரியும் உதவியாளர் லட்சுமி மற்றும் பெரியநாயகம் ஆகியோர் மீதும் நடவடிக்கை எடுக்கப்பட்டுள்ளது. மேலும் கலெக்டர் அன்சுல் மிஸ்ரா நடத்திய விசாரணையில், சம்பவம் நடந்த அன்று, பள்ளியில் அறை கண்காணிப்பாளராக இருந்த, ஆர்ப்பாக்கம் அரசு உயர்நிலைப்பள்ளி ஆசிரியர் செந்தில்குமார், தேர்வு அறையில், அலைபேசியில் பேசிக் கொண்டிருந்தது கண்டுபிடிக்கப்பட்டது.

"பிட்' பரிமாறிய ஆசிரியர் : கலெக்டர் ஆய்வு செய்து கொண்டிருந்த போது, அலைபேசி மணி ஒலித்தது. அதை எடுத்து, கலெக்டர் அன்சுல் மிஸ்ரா கேட்டபோது, "என்னுடைய மகனுக்கு பிட் சேர்ந்து விட்டதா? எப்படி எழுதுகிறான்?' என, எதிர்முனையில் இருப்பவர் பேசினார். விசாரணையில், பேசியவர், திருவண்ணாமலை சண்முகா அரசு மேல்நிலைப்பள்ளி தமிழாசிரியர் தங்கமுருகன் எனவும், தொடர்ந்து மூன்று முறை அலைபேசியில் தொடர்பு கொண்டு, தன் மகனுக்காக பேசியதும், இரண்டு முறை எஸ்.எம்.எஸ்., மூலம் தேர்வு விடைகள் பரிமாற்றம் செய்யப்பட்டதும் தெரிந்தது. மேலும், தங்கமுருகனுக்கு வேறொரு பள்ளியில் தேர்வுப் பணிக்கான உத்தரவு அளிக்கப்பட்டும், அந்த பணிக்கு செல்லாமல் இருந்ததும் தெரிந்தது. ஆசிரியர் தங்கமுருகனை, "சஸ்பெண்ட்' செய்து, கலெக்டர் உத்தரவிட்டார்.

காவலாளியும் உடந்தை : பள்ளி காவலாளி அந்தோணி என்பவர், பறக்கும் படை வருவதை, வாசலிலிருந்து அலைபேசியில் தெரிவிப்பது, வெளியில் இருந்து தரும், "பிட் பேப்பரை' தண்ணீர் தருவது போல் சென்று, மாணவர்களிடம் சேர்ப்பது போன்ற நடவடிக்கையில் ஈடுபட்டதும் தெரிய வந்தது. இதையடுத்து, இவர் மீதும், போலீசில் புகார் செய்யப்பட்டுள்ளது. இதுவரை இந்த சம்பவம் தொடர்பாக, 12 பேர் மீது, போலீசில் புகார் செய்யப்பட்டுள்ளது. போலீசார், எந்த பிரிவின் கீழ் வழக்கு பதிவு செய்து, கைது செய்வது என்பது குறித்து, ஆலோசனை நடத்தி வருகின்றனர்.



தினமலர்