மின்சாரத்துக்கு பணம் கொடுக்கவில்லை : கோர்ட்டில் "டாஸ்மா' வழக்கு

அச்சலா · அச்சலா Fri Nov 30, 2012 5:46 am

திருப்பூர்: நூற்பாலைகள் வழங்கிய மின்சாரத்துக்கான கட்டண பாக்கி தொகை 42 கோடி ரூபாயை வழங்கக்கோரி, தமிழ்நாடு ஸ்பின்னிங் மில் அசோசியேஷன் சார்பில், மதுரை ஐகோர்ட் கிளையில் வழக்கு தொடரப்பட்டுள்ளது.
தமிழ்நாடு ஸ்பின்னிங் மில் அசோசியேஷன் தலைமை ஆலோசகர் வெங்கடாசலம் அறிக்கை:
பஞ்சில் இருந்து நூல் உற்பத்தி செய்யும் 506 நூற்பாலைகள், தமிழகத்தில் இயங்கி வருகின்றன. இவற்றில், 317 நூற்பாலைகள், காற்றாலைகள் நிறுவி, தங்களுக்கு தேவையான மின்சாரத்தை உற்பத்தி செய்து பயன்படுத்தி வருகின்றன. நூற்பாலைகள் தேவைக்குபோக மீதமாகும் மின்சாரத்தை, சேமித்து வைத்து மின்வாரியத்துக்கு வழங்கப்படுகிறது.

கடந்த 2006ல் நிறுவப்பட்ட காற்றாலைகளுக்கு யூனிட்டுக்கு 2.75 ரூபாய்; 2006க்கு பின் துவங்கப்பட்ட காற்றாலைகளுக்கு ரூ.2.90; 2008க்கு பின் துவங்கப்பட்ட காற்றாலைகளுக்கு யூனிட்டுக்கு ரூ.3.39 என, மூன்று பிரிவுகளாக பிரித்து, நூற்பாலைகள் வழங்கும் மின்சாரத்துக்கு மின்வாரியம் பணம் பட்டுவாடா செய்கிறது. கடந்த 2011 முதல் தற்போது வரை, மின்வாரியத்துக்கு ரூ.42 கோடி மதிப்பிலான மின்சாரம் வழங்கப்பட்டுள்ளது. ஆனால், மின் கட்டணத்தை இரண்டு ஆண்டுகளாகியும் மின்வாரியம் வழங்காமல் உள்ளது.
நூற்பாலைகளுக்கு செலுத்த வேண்டிய மின் கட்டண தொகையை உடனடியாக வழங்கக்கோரி, தமிழ்நாடு ஸ்பின்னிங் மில் அசோசியேசன் சார்பில், மதுரை ஐகோர்ட் கிளையில் வழக்கு தொடரப்பட்டது. வழக்கு விசாரணையில், நூற்பாலைகளுக்கு வழங்க வேண்டிய மின் கட்டணத்தை இரண்டு மாதங்களுக்குள் வழங்குவதாக மின்வாரியம் பதில் மனு தாக்கல் செய்துள்ளது, இவ்வாறு அறிக்கையில் கூறப்பட்டுள்ளது.

-தினமலர்