என்ஐடி, ஐஐடி பொது நுழைவுத்தேர்வு தமிழில் எழுத வாய்ப்பு கிடைக்குமா?

என்ஐடி, ஐஐடி பொது நுழைவுத்தேர்வு தமிழில் எழுத வாய்ப்பு கிடைக்குமா?


திருச்சி:தேசிய தொழில்நுட்ப கழகங்கள் (என்ஐடி), இந்திய தொழில்நுட்ப கழகம் (ஐஐடி), இந்திய தகவல் தொழில்நுட்ப கழகம் மற்றும் மத்திய உயர்கல்வி நிறுவனங்களில் மாணவர் சேர்க்கைக்கு பொது நுழைவுத்தேர்வு நடத்தப்பட உள்ளது. நுழைவுத்தேர்வு மற்றும் பிளஸ் 2 பொதுத்தேர்வு மதிப்பெண் ஆகியவற்றை கொண்ட ஒருங்கிணைந்த தரவரிசை அடிப்படையில் சேர்க்கை கலந்தாய்வு நடத்தப்படும்.இதன்படி என்ஐடி போன்ற நிறுவனங்களில் சேருவதற்கான முதன்மை தேர்வு ஏப்ரல் 7ம் தேதி நடக்கிறது. முதல் தாள் தேர்வு காலையிலும், பி.ஆர்க்., பி.பிளானிங் படிப்புகளில் சேருவதற்கான இரண்டாம் தாள் தேர்வு பிற்பகலிலும் நடக்கிறது. கடந்த 2011-12 ஆண்டில் பிளஸ் 2 பொதுத்தேர்வு தேர்ச்சி பெற்றவர்கள் அல்லது ஏப்ரல் மாதம் பிளஸ் 2 பொதுத்தேர்வு எழுத உள்ளவர்கள் விண்ணப்பிக்கலாம்.முதன்மை தேர்வில் தேர்ச்சி பெற்றவர்கள் ஐஐடிக்களில் சேருவதற்கான அட்வான்ஸ்டிஸ்ட் தேர்வுக்கு மே 8-13ம் தேதி வரை ஆன்லைன் மூலம் விண்ணப்பிக்கலாம். முதன்மை தேர்வுக்கு வரும் 15ம் தேதிக்குள் விண்ணப்பிக்க வேண்டும். இது குறித்த மேலும் விவரங்கள், விண்ணப்ப கட்டணம், விண்ணப்பிக்கும் முறை ஆகியவற்றை என்ற இணையதளத்தில் காணலாம்.

மேலும் முதன்மை நுழைவுத்தேர்வு தமிழகத்தில் சென்னை, மதுரை, புதுச்சேரி ஆகிய இடங்களில் நடத்தப்படும். கணினி வழியாக ஆன் லைனில் எழுதுவோர் சென்னையில் மட்டுமே தேர்வு எழுத முடியும். வினாத்தாள் இந்தி மற்றும் ஆங்கிலத்தில் இருக்கும். குஜராத் மாநில மையங்களில் மட்டும் குஜராத்தி மொழியில் வினாத்தாள் வழங்கப்படும் என்று அறிவிக்கப்பட்டுள்ளது.அகில இந்திய அளவில் நடக்கும் பொதுத்தேர்வுகளில் தமிழ் உள்ளிட்ட மாநில மொழிகள் புறக்கணிக்கப்படுகிறது என்ற குற்றச்சாட்டு உள்ளது. இந்நிலையில், மத்திய அரசு கல்வி நிறுவனங்களுக்கு தற்போது நடத்தப்படும் பொது நுழைவுத்தேர்வில், தமிழக மாணவர்கள் அதிக அளவில் மத்திய கல்வி நிறுவனங்களில் சேரும் வகையில், தமிழிலும் வினாத்தாள் வழங்கப்பட வேண்டும். இதற்கு தமிழக அரசு நடவடிக்கை எடுக்க வேண்டும் என்று கல்வியாளர்கள் வலியுறுத்தியுள்ளனர். திருச்சியில் இல்லை:திருச்சி துவாக்குடியில் என்ஐடி உள்ளது. சில ஆண்டுகளுக்கு முன்பு காரைக்காலில் என்ஐடி தொடங்கப்பட்டது. முன்பு நடத்தப்பட்ட அகில இந்திய பொறியியல் பொது நுழைவுத்தேர்வுக்கு திருச்சியில் தேர்வு மையம் இல்லை. திருச்சியில் தேர்வு மையம் அமைக்க வேண்டும் என்று வலியுறுத்தப்படுகிறது. இந்நிலையில், பொது நுழைவுத்தேர்வுக்கு தமிழகத்தில் சென்னை, மதுரை மட்டுமே தேர்வு மையங்களாக அறிவிக்கப்பட்டுள்ளன.

-தினகரன்