டோனியிடம் நிறைய கற்று வருகிறேன்: பிராவோ சொல்கிறார்

**ராஜா** · **ராஜா** Tue May 07, 2013 4:05 pm

சென்னை சூப்பர் கிங்ஸ் வீரர் வெய்ன் பிராவோ. வெஸ்ட் இண்டீசை சேர்ந்த இவர் ஆல்- ரவுண்டராக கலக்கி வருகிறார். தற்போது 6-வது ஐ.பி.எல். கிரிக்கெட் விளையாடி வரும் அவர் அதிக விக்கெட் எடுத்து (20 விக்கெட்) முதலிடத்தில் உள்ளார்.

இங்கிலாந்தில் அடுத்த மாதம் நடக்கும் சாம்பியன்ஸ் டிராபி கிரிக்கெட் போட்டியில் வெஸ்ட்இண்டீஸ் அணிக்கு கேப்டனாக வெய்ன் பிராவோ நியமிக்கப்பட்டுள்ளார். இந்த நிலையில் சென்னை சூப்பர் கிங்ஸ் அணி கேப்டன் டோனியிடம் இருந்து நிறைய கற்று வருகிறேன் என்று பிராவோ கூறியுள்ளார்.

அவர் கூறியதாவது:-

டோனியிடம் நான் களத்திலும், வெளியிலும் நிறைய கற்று வருகிறேன். நாங்கள் கிரிக்கெட்டை பற்றி நீண்ட நேரம் பேசுவோம். ஒவ்வொரு நிமிடத்தையும் மகிழ்ச்சியுடன் கழிக்கிறேன். வெஸ்ட்இண்டீஸ் அணிக்கு கேப்டனாக நியமிக்கப்பட்ட உணர்வு சிறப்பானதாக இருக்கிறது. நிறைய திறமையான வீரர்களுக்கு தலைமை தாங்க போகிறேன்.

வெஸ்ட்இண்டீஸ் அணியில் ரவி ராம்பால், பொல்லார்டு, சுனில் நரைன் ஆகியோர் இருப்பது பலமாக உள்ளது. திறமையான வீரர்களுடன் விளையாட வாய்ப்பு உருவாகி உள்ளது. என்னுடைய நோக்கம் சிறப்பாக விளையாடி உலகின் பார்வையை வெஸ்ட்இண்டீஸ் அணி மீது திருப்ப வேண்டும் என்பதே.

சாம்பின்ஸ் டிராபி கிரிக்கெட்டில் நாங்கள் கடினமான பிரிவில் உள்ளோம். இந்தியா, பாகிஸ்தான், தென்ஆப்பிரிக்கா அணிகளுடன் மோத உள்ளோம். வெற்றி என்பது எளிதானது கிடையாது. சாம்பியன்ஸ் டிராபி கிரிக்கெட்டில் சிறப்பாக விளையாட முயற்சிப்போம்.

இப்போது, எப்போதும் எனக்கு பிடித்த வீரர் பிரையன் லாரா. அவர் தவிர ஜேக் காலிசையும், என்னையும், சக வீரர் பொல்லாட்டையும் பிடிக்கும். போல்லார்ட்டுடன் விளையாடுவது பெருமை.