அமெரிக்க பார்லி.,க்குள் நுழைய காத்திருக்கும் இந்தியர்கள்

வாஷிங்டன்:
அமெரிக்க அதிபர் தேர்தலுடன், பார்லிமென்டுக்கு நடக்கும் தேர்தலில், அதிக இந்தியர்கள் வெற்றி பெறுவர் என்ற எதிர்பார்ப்பு எழுந்துள்ளது.

அமெரிக்க அதிபர் பதவிக்கான தேர்தல், நவ., 3ல் நடக்க உள்ளது. அத்துடன், அமெரிக்க பார்லிமென்ட் செனட் மற்றும் பிரதிநிதிகள் சபை, எம்.பி., பதவிக்கான தேர்தலும் நடக்க உள்ளது. தற்போதைய நிலையில், அமெரிக்க பார்லிமென்டில், இந்தியாவை பூர்வீகமாக உடைய, ஐந்து பேர், எம்.பி.,க்களாக உள்ளனர். 'சமோசா காகஸ்' என, இந்தக் குழுவுக்கு, எம்.பி.,யான ராஜா கிருஷ்ணமூர்த்தி செல்லப் பெயர் வைத்துள்ளார்.

காகஸ் என்பதற்கு குழு என்று அர்த்தம். இந்தியாவில் மிகவும் பிரபலமான உணவு வகையான, சமோசாவை குறிக்கும் வகையில், சமோசா காகஸ் என்று அவர் பெயரிட்டுள்ளார்.செனட் எம்.பி.,யாக உள்ள, கமலா ஹாரிஸ், துணை அதிபர் பதவிக்கு போட்டியிடுகிறார். பிரதிநிதிகள் சபையில், டாக்டர் அமி பேரா, ரோ கன்னா, ராஜா கிருஷ்ணமூர்த்தி, பிரமிளா ஜெயபால் உள்ளனர்.

டாக்டர் அமி பேரா, ஐந்தாவது முறையாகவும், ரோ கன்னா, மூன்றாவது முறையாகவும் போட்டியிடுகின்றனர். பிரதிநிதிகள் சபையின் ஒரே இந்திய பெண்ணான பிரமிளா ஜெயபால், தொடர்ந்து மூன்றாவது முறையாக போட்டியிடுகிறார்.கமலா ஹாரிஸ், செனட் எம்.பி.,யாகவும் மற்ற நான்கு பேர்,பிரதிநிதிகள் சபை எம்.பி.,யாக மீண்டும் வெற்றி பெறுவது உறுதியாகி உள்ளது.

இந்நிலையில், மேலும், சில இந்தியர்களும், பார்லிமென்டுக்கு தேர்ந்தெடுக்கப்பட வாய்ப்பு உள்ளதாக தெரிகிறது. ஜனநாயகக் கட்சியைச் சேர்ந்த டாக்டர் ஹிரால் திபிர்னேனி, அரிசோனா மாகாணத்தில் இருந்து பிரதிநிதிகள் சபைக்கு போட்டியிடுகிறார். டெக்சாஸ் மாகாணத்தில், முன்னாள் அரசு அதிகாரியான ஸ்ரீ பிரஸ்டான் குல்கர்னி போட்டியிடுகிறார். கடந்த தேர்தலில் தோல்வியடைந்த இவர், இம்முறை வெற்றி பெற அதிக வாய்ப்புள்ளதாக கூறப்படுகிறது.

செனட் சபைக்கு மைனேயில் இருந்து ஜனநாயகக் கட்சி சார்பில் போட்டியிடும் சாரா கிடியான் பெரும் எதிர்பார்ப்பை ஏற்படுத்தியுள்ளார். மிகவும் வலுவான சூசன் கோலின்ஸ்க்கு எதிராக அவர் முன்னிலையில் உள்ளார்.இவர்களைத் தவிர, மேலும் சில இந்தியர்களும் தேர்தல் களத்தில் உள்ளனர். ஆனால், அவர்களுக்கான வெற்றி வாய்ப்பு மிகவும் குறைவாக உள்ளது. அதே நேரத்தில், இந்தியாவை பூர்வீகமாகக் கொண்டவர்களிடம் தேர்தலில் போட்டியிடும் ஆர்வம் அதிகரித்துள்ளது.

தோற்க வேண்டுமா!



நீங்கள் பார்த்த ஜனநாயகக் கட்சி தற்போது இல்லை. அதிபர் தேர்தலில் ஜனநாயகக் கட்சியின் ஜோ பிடன் வெற்றி பெற்றால், இடதுசாரி பயங்கரவாதிகளின் கைக்கு, நாடு சென்றுவிடும். அமெரிக்க மக்களின் வாழ்க்கையை அவர்கள் நாசம் செய்து விடுவர். வைரஸ் பரவலை தடுப்பதாகக் கூறி, நாட்டை முடக்கிவிடுவார்கள். தடுப்பூசி கிடைப்பதை தடுத்துவிடுவார்கள். அமெரிக்க வரலாற்றிலேயே மிகவும் மோசமான ஒரு வேட்பாளரிடம் நான் தோற்க வேண்டுமா.

டொனால்டு டிரம்ப்
அமெரிக்க அதிபர், குடியரசு கட்சி



தவறாக உச்சரித்ததால் சர்ச்சை

ஜார்ஜியா மாகாணத்தில், குடியரசு கட்சியின் செனட், எம்.பி.,யான டேவிட் பர்டு பிரசாரத்தில் ஈடுபட்டிருந்தார். ஜனநாயகக் கட்சியின் துணை அதிபர் வேட்பாளரான, இந்தியாவை பூர்வீகமாக கொண்ட, கமலா ஹாரிஸ் பெயரை, அவர் தவறாக உச்சரித்தார்.

மீண்டும் மீண்டும் வேண்டுமென்றே அவர் தவறாக உச்சரித்தார்.
இதையடுத்து, ஜனநாயகக் கட்சி சார்பில், சமூக வலை தளத்தில்,
பெயர் உச்சரிப்பது குறித்த பிரசாரம் துவக்கப்பட்டுள்ளது.
இதில் பலர், தங்கள் பெயரைக் குறிப்பிட்டு, அதற்கான
அர்த்தத்தையும் கூறியுள்ளனர்.

தினமலர்