ஒத்திவைப்பு தீர்மானம் கொண்டுவர எதிர்க்கட்சிகள் தீவிரம்

விலைவாசி பிரச்னை தொடர்பாக பார்லிமென்டில் ஒத்திவைப்பு தீர்மானம் கொண்டு
வர அனைத்து எதிர்க்கட்சிகளும் தீவிரமாக உள்ளன. பார்லிமென்டின் மழைக்கால
கூட்டத் தொடர் நேற்று முறைப்படி துவங்கியது. முதல்நாளான நேற்று, முன்னாள்
துணை ஜனாதிபதி பைரோன்சிங் ஷெகாவத் மற்றும் தற்போதைய சபையில் எம்.பி.,யாக
இருந்த, முன்னாள் அமைச்சர் திக்விஜய்சிங் ஆகியோரின் மறைவுக்கு அஞ்சலி
செலுத்தப்பட்டது.
அதேபோல மத்திய ரிசர்வ் போலீஸ் படை வீரர்கள் பலியான சம்பவம், மங்களூர்
ஏர்-இந்தியா விமான விபத்து மற்றும் சமீபத்திய ரயில் விபத்துகளில்
பலியானவர்களுக்கு அஞ்சலி செலுத்தப்பட்டது. தவிர பஞ்சாப், அரியானா
மாநிலங்களில் வெள்ளத்தில் சிக்கி பலியானவர்களுக்கும் அஞ்சலி
செலுத்தப்பட்டது. பின்னர் நாள் முழுவதும் சபை
ஒத்திவைக்கப்பட்டது.இந்நிலையில், இன்று முதல் துவங்கவுள்ள கூட்டத்தொடர்,
பெரும் புயலை கிளப்பும் என, எதிர்பார்க்கப்படுகிறது. பெட்ரோல், டீசல் விலை
உயர்வு காரணமாக அத்தியாவசியப் பொருட்களின் விலை உயர்ந்து விட்டதை
சுட்டிக்காட்டி, அரசுக்கு நெருக்கடி அளிக்க எதிர்க்கட்சிகள் தயாராகி
விட்டன. இதற்காக, ஒத்திவைப்பு தீர்மானத்தை கொண்டு வர எதிர்க்கட்சிகள்
தீர்மானித்துள்ளன.
ஒத்திவைப்பு தீர்மானத்தை கொண்டு வருவதற்கான நோட்டீசை பா.ஜ., உள்ளிட்ட
ஒவ்வொரு எதிர்க்கட்சியுமே சபாநாயகர் மீரா குமாரிடம் அளித்துள்ளன. மற்ற எந்த
அலுவல்களையும் இப்போதைக்கு எடுத்துக் கொள்ள வேண்டாம், எல்லாவற்றையும்
ஒத்திவைத்துவிட்டு முதல் வேலையாக விலைவாசி பிரச்னையை எடுத்துக் கொள்ள
வேண்டும் என, அந்த நோட்டீசில் வலியுறுத்தப்பட்டுள்ளது. எதிர்க்கட்சித்
தலைவர் சுஷ்மா சுவராஜ் உட்பட மற்ற எதிர்க்கட்சித் தலைவர்களும் ஒத்திவைப்பு
தீர்மானத்தில் பிடிவாதமாக உள்ளனர். எனவே, எதிர்க்கட்சிகள் அளித்துள்ள
ஒத்திவைப்பு தீர்மான நோட்டீசுக்கு சபாநாயகர் மீரா குமார் அனுமதி அளிப்பாரா
என்ற பரபரப்பு எழுந்துள்ளது.
மழைக்கால கூட்டத் தொடருக்காக கூட்டப்பட்ட அனைத்துக்கட்சி ஆலோசனை
கூட்டத்தில், விலைவாசி பிரச்னைக்காக ஒத்திவைப்பு தீர்மானத்தை கொண்டு வந்து
விவாதம் நடத்த அனுமதித்தால் மட்டுமே சபையை சுமுகமாக நடத்த விடுவோம் என்று,
சபாநாயகரிடம் எதிர்க்கட்சிகள் அனைத்தும் தெளிவாக கூறிவிட்டன.ஆனாலும்,
சபாநாயகர் என்ன முடிவு எடுப்பார் என்பது இன்னும் தெளிவாக தெரியவில்லை.
அநேகமாக இன்று காலை, சபாநாயகர் தன் முடிவை அறிவிப்பார்.
கடந்த கூட்டத் தொடரின்போதும் ஒத்திவைப்பு தீர்மானத்தை எதிர்க்கட்சிகள்
கொண்டு வர முயன்றன. ஆனால், சமீபத்திய சம்பவங்கள் ஏதும் நடந்திருந்தால்
மட்டுமே எடுத்துக் கொள்ள முடியும் என்று காரணம் காட்டி சபாநாயகர்
நிராகரித்துவிட்டார்.தற்போது பெட்ரோல், டீசல் விலைகள் சமீபத்தில்
உயர்ந்துள்ளன. விலைவாசியும் உயர்ந்துள்ளது. சமீபத்திய சம்பவம் இது என்பதால்
ஒத்திவைப்பு தீர்மானத்துக்கு இம்முறை அரசும், சபாநாயகரும் அனுமதி அளித்தே
ஆக வேண்டுமென்று எதிர்க்கட்சிகள் எதிர்பார்த்து காத்துள்ளன. அதனால்,
பார்லிமென்ட் இன்று முதல் அமளி துமளியாகும் என, எதிர்பார்க்கப்படுகிறது.