சாயிபாபா உதவியாளர் உயிருக்கு ஆபத்து !

அப்துல்லாஹ் · அப்துல்லாஹ் Tue Apr 26, 2011 5:05 pm

சாய்பாபா உதவியாளரின் உயிருக்கு ஆபத்து!

தமிழகத்தைச் சேர்ந்த சத்யஜித், பல ஆண்டுகளாக சத்ய சாய்பாபாவின் காப்பாளராக இருந்து வருகிறார்.

சாய்பாபா மருத்துவமனையில் அனுமதிக்கப்பட்டதில் இருந்து இவர் மீது ஏராளமான குற்றச்சாட்டுகள் கூறப்படுகின்றன.

சாய்பாபாவுக்கு முறையாக உணவு அளிக்கவில்லை. நிறைய வலி நிவாரண மருந்துகளை அளித்துள்ளார். அதனால்தான் சாய்பாபாவின் உடல் மோசமானது என சத்யஜித் மீது குற்றம்சாட்டப்படுவதாக போலீஸ் வட்டாரங்கள் தெரிவித்தன.

சுவாசக் கோளாறால் மருத்துவமனையில் அனுமதிக்கப்படுவதற்கு முன்பு சாய்பாபாவுக்கு வலி நிவாரண மருந்துகள் கொடுக்கப்பட்டுள்ளதாகக் கூறப்படுவதை சாய்பாபா மருத்துவமனை டாக்டர்கள் உறுதிப்படுத்தவும் இல்லை; மறுக்கவும் இல்லை.

சாய் அறக்கட்டளை காசோலைகளில் சத்யஜித் கையெழுத்திட்டு வந்ததாகக் கூறப்படுகிறது. மேலும் ஆசிரம விவகாரங்களை தீர்மானிப்பதில் மிகவும் அதிகாரம் மிக்க நபராக சத்யஜித் கருதப்பட்டு வருகிறார்.

சத்யஜித்துக்கு ஆசிரமத்திலும், வெளியிலும் எதிர்ப்பாளர்கள் உள்ளனர். பாபா மறைவின் எதிரொலியாக அவரது உயிருக்கு அச்சுறுத்தல் ஏற்படுவதற்கான சாத்தியக்கூறு உள்ளது. அதனால் அவருக்கு போலீஸ் பாதுகாப்பு வழங்கப்பட்டுள்ளதாக உயர் போலீஸ் அதிகாரி ஒருவர் தெரிவித்தார்.

சத்யஜித் திங்கட்கிழமை மாலை பாபாவின் உடல் அருகே சிறிதுநேரம் மட்டுமே இருந்தார். மற்ற நேரங்களில் பிரசாந்தி நிலையத்தில் உள்ள தனது அறையிலேயே அடைந்துகிடக்கிறார்.

பாபாவின் இறுதிச்சடங்குகள் முடியும்வரை பிரசாந்தி நிலையத்தைவிட்டு வெளியே வர வேண்டாம் என அவருக்கு அறிவுறுத்தப்பட்டுள்ளதாக தகவல்கள் குறிப்பிடுகின்றன.
நக்கீரன்
ஏப்ரல் 26 2011