சதுர்த்திக்காக தயாராகும் விநாயகர் சிலைகள்

விநாயகர் சதுர்த்தியையொட்டி பல்வேறு பகுதிகளில் வைத்து வழிபாடு நடத்ததும் வகையில் காரைக்காலில் விநாயகர் சிலைகள் தயாராகி வருகின்றன. தற்போது சிலைகளுக்கு வர்ணம் பூசும் பணி தீவிரமாக நடந்து வருகிறது.

வரும் செப்.5-ஆம் தேதி விநாயகர் சதுர்த்தி விழா நடைபெறவுள்ளது. ஒவ்வொரு ஆண்டும் விநாயகர் சிலைகள் வைத்து பூஜை செய்து, நீர்நிலைகளில் விசர்ஜனம் செய்யும் வழக்கம் உள்ளது. இதையொட்டி, காரைக்காலில் விநாயகர் சிலைகள் செய்யப்பட்டு, தற்போது நிறைவாக வர்ணம் பூசும் பணி தீவிரமாக நடைபெற்று வருகிறது.

இதுகுறித்து காரைக்கால் மாவட்டம், நிரவியில் சிலைகள் தயார் செய்யும் மையப் பொறுப்பாளர் சிவசுப்பிரமணியன் ஞாயிற்றுக்கிழமை கூறியது:

சிலைகள் தயார் செய்யும் பணி பல ஆண்டுகளாக இங்கு மேற்கொள்ளப்படுகிறது. நிகழாண்டு புது வரவாக, அண்ணாமலையாரை அணைத்தபடி விநாயகர், குண்டோதரன், நடராஜர், சிபிகுட்டி விநாயகர், ஜான்சிராணி, வழக்கமாக பயன்பாட்டில் உள்ள ஆஞ்சநேயர், சிவலிங்கத்தின் மேல் விநாயகர், யானை, சிங்கம், புலி, எலி, ரிஷபம், மயில், அன்னம், மேளத்தின் மீது விநாயகர், 6 கைகளுடன் விநாயகர், கருடன், செம்பருத்தி மலரின் மீது விநாயகர் என பல்வேறு உருவங்களுடன் சிலைகள் தயார் செய்யப்பட்டுள்ளன. 3 முதல் 10 அடி உயரத்தில் சிலைகள் உள்ளன.

கடந்த ஒரு மாதமாக சிலைகளில் உறுப்புகளை ஒருங்கிணைக்கும் பணிகள் நடைபெற்றன. இப் பணிகள் நிறைவுற்று தற்போது வர்ணம் பூசும் பணி நடைபெறுகிறது. ஆகஸ்ட் மாத மத்தியில் சிலைகள் விற்பனைக்கு தயாராகிவிடும். விநாயகர் சதுர்த்திக்கு முன்னதாக சில இடங்களில் 10 நாள் வழிபாட்டுக்காக சிலைகளை வைப்பர். இதற்காக, பல்வேறு இடங்களில் இருந்து ஆர்டர்கள் வந்துள்ளன. சுற்றுச்சூழல் மாசுபடாத வகையில் அரசு வழிகாட்டுதலின்படி சிலைகள் தயார்படுத்தப்படுகிறது என்றார் அவர். காரைக்கால் மாவட்டத்தில் இந்த ஒரு இடத்தில் மட்டுமே சிலைகள் தயார் செய்து விநியோகம் செய்யப்படுகிறது. சுமார் 250 சிலைகள் தயார் செய்வதாக தயாரிப்பாளர்கள் தெரிவித்தனர்.
-
தினமணி