எப்பொழுதும் பெண்...பெண்ணல்ல.

**rameshnaga** · **rameshnaga** Mon Jun 20, 2011 10:53 pm

அத்தனை நம்பிக்கையுடன் ...
எனது கனவுகளையும் சேர்த்துக் கையளித்தேன்..
உன்னிடம்-
என்னோடு..என் கனவுகளையும் சேர்த்து
நீ காப்பாற்றுவாயென.
நீயும்..
உனது கண்களில் விநயம் வழிய..
ஏற்றுக் கொண்டாய்..
என்னையும்..எனது கனவுகளையும்.
உனது மோகம் கிளை மாறத் துவங்கிய நாளில்..
பூமியில் கிடந்தது என் கனவு.
எனது கனவுகளின் பரந்த வானம் சுருங்கி..
வழிகிறது நீர்த் துளிகளாய்..
எனது கன்னங்களில்.
என்றாலும்..
அடுப்படியில்-வெளியேறும் புகையினூடே
தன் கனவுகளைத் தவறவிட்ட
என் அம்மா இல்லை நான்.
இன்று-நீ உதறிய எச்சமாய்
நான் இருந்தாலும் -
விருக்ஷமாவேன் நாளை.
அன்று நிச்சயம் உன்னைத் தூக்கிலிடுவேன் -
தவிக்கும் என் வேர்களால்.