துபாய், ஜன.21-

சர்வதேச கிரிக்கெட் கவுன்சில் (ஐ.சி.சி.) டெஸ்ட் வீரர்களின் புதிய தரவரிசை பட்டியலை வெளியிட்டுள்ளது. இதில் பேட்ஸ்மேன்களின் தரவரிசையில் டாப்-10 இடத்திற்குள் இந்திய தரப்பில் சச்சின் தெண்டுல்கர் மட்டுமே உள்ளார். அவர் 9-வது இடத்தில் நீடிக்கிறார். டிராவிட் 15-வது இடத்திலும், வி.வி.எஸ்.லட்சுமண் 21-வது இடத்திலும் உள்ளனர்.

இலங்கையின் சங்கக்கரா முதலிடத்தையும், தென்ஆப்பிரிக்காவின் காலிஸ் 2-வது இடத்தையும் வகிக்கிறார்கள். பந்து வீச்சாளர்களின் தரவரிசையில் பாகிஸ்தான் சுழற்பந்து வீச்சாளர் சயீத் அஜ்மல் கிடுகிடுவென முன்னேற்றம் கண்டுள்ளார். துபாயில் நடந்த இங்கிலாந்துக்கு எதிரான டெஸ்டில் 10 விக்கெட்டுகள் வீழ்த்தி வெற்றிக்கு வித்திட்ட அவர் 9 இடங்கள் ஏற்றம் கண்டு 3-வது இடத்தை பிடித்துள்ளார்.

முதல் இரு இடங்களில் முறையே தென்ஆப்பிரிக்காவின் ஸ்டெயின், இங்கிலாந்தின் ஜேம்ஸ் ஆண்டர்சன் உள்ளனர். இங்கிலாந்து சுழற்பந்து வீச்சாளர் ஸ்வான் ஒரு இடம் இறங்கி 4-வது இடத்திற்கு தள்ளப்பட்டுள்ளார். இதே போல் இந்திய வேகப்பந்து வீச்சாளர் ஜாகீர்கான் ஒரு இடம் சரிந்து 9-வது இடத்தில் இருக்கிறார். முதல் 10 இடத்திற்குள் இந்திய பவுலர்களில் ஜாகீர்கான் மட்டுமே உள்ளார்.

மாலைமலர்