கோவை: மின் தடையை கண்டித்து 40 ஆயிரம் தொழிற்சாலைகள் பங்கேற்கும் ஒரு நாள் வேலை நிறுத்த போராட்டம் நடத்தப்படும் என தொழில் அமைப்புகள் அறிவித்துள்ளன. கோவை அவிநாசி சாலையில் உள்ள கொடிசியா வளாகத்தில், அனைத்து தொழில் அமைப்புகள் சார்பில் ஆலோசனை கூட்டம் நேற்று நடந்தது. இதைதொடர்ந்து மாவட்ட சிறு தொழில் சங்க(கொடிசியா) தலைவர் கந்தசாமி நிருபர்களிடம் கூறியதாவது:

கோவை மாவட்டத்தில் அறிவிக்கப்பட்ட மற்றும் அறிவிக்கப்படாத மின் வெட்டு நீடிக்கிறது. கடந்த ஆண்டில் இருந்து இதுவரை 5 ஆயிரத்திற்கும் மேற்பட்ட தொழிற்சாலைகள் மூடப்பட்டன. மேலும் 5 ஆயிரம் தொழிற்சாலைகள் மூடப்படும் அபாய நிலையில் இருக்கிறது. கடந்த 6 மாதமாக மின் தடை நேரம் அதிகரித்துள்ளது.

சென்னையில் தினமும் 1 மணி நேரம் மின்தடை ஏற்படுகிறது. கோவை மாவட்டத்தில் தினமும் 8 மணி நேரம் மின்தடை ஏற்படுகிறது. தமிழகத்தில் புதிய அரசு பதவியேற்றும் மின்தடை பிரச்னை தீர்க்கப்படவில்லை. மின் வெட்டினால் தொழிற்சாலைகளில் உற்பத்தி பாதிக்கப்பட்டுள்ளது. தினமும் மாவட்ட அளவில் ரூ.250 கோடிக்கு உற்பத்தி இழப்பு ஏற்படுகிறது. பல ஆயிரம் தொழிலாளர்கள் வேலை இழந்து தவிக்கின்றனர். தொழிற்சாலைகளை வெகுநேரம் மூடி வைத்திருக்க வேண்டியுள்ளது.

உற்பத்தி குறைவினால் தொழிற்சாலை நிர்வாகங்கள் வங்கிகளில் வாங்கிய கடனை திருப்பி செலுத்த முடியாமல் திணறிக் கொண்டிருக்கிறது. மின்வெட்டு பிரச்னை குறித்து தமிழக அரசுக்கு பல முறை தெரிவித்தும், மனு கொடுத்தும் எந்த நடவடிக்கையும் எடுக்கவில்லை. வாரம் ஒரு நாள் மின் விடுமுறை வழங்கலாம் என தெரிவித்தோம். அதையும் மின்வாரியம் செயல்படுத்த முன்வரவில்லை. மின்சாரம் எப்போது துண்டிக்கப்படுகிறது என யாருக்கும் தெரியாத நிலையிருக்கிறது.

மின்தடையை கண்டித்து அனைத்து தொழில் அமைப்புகள் சார்பில் வரும் 10ம் தேதி கோவை காந்திபுரம் தமிழ்நாடு ஓட்டல் முன்பு காலை 10 மணிக்கு ஆர்ப்பாட்டம் நடத்தப்படும். அன்றைய தினம் மாவட்ட அளவில், 35 ஆயிரம் முதல் 40 ஆயிரம் தொழிற்சாலைகள் மூடப்படும். 1 லட்சத்திற்கும் மேற்பட்டவர்கள் இந்த ஆர்ப்பாட்டத்தில் கலந்து கொள்ள உள்ளனர்.

2500 மெகாவாட் பற்றாக்குறை

மின்வாரிய அதிகாரி ஒருவர் கூறுகையில், ‘‘ கோவை மண்டலத்திற்கு 10 ஆயிரம் மெகாவாட் மின்சாரம் தேவை. ஆனால் 7500 மெகா வாட் மின்சாரம் மட்டுமே கிடைக்கிறது. 2500 மெகாவாட் மின்சாரம் பற்றாக்குறை இருக்கிறது. மேட்டூரில் இருந்து கோவைக்கு வரும் மின்சாரம் வெகுவாக குறைந்து விட்டது. வெயில் சீசன் துவங்கியதால் மின் தேவை அதிகரித்து வருகிறது. 95 சதவீதத்திற்கும் மேற்பட்ட வீடுகளில் பல மணி நேரம் டிவி இயங்குகிறது. பள்ளி தேர்வு காலமாக இருப்பதால், இரவில் மின்தடை கூடாது. பகலில் மட்டும் மின்தடை செய்யுங்கள் என கோரிக்கை வருகிறது. மின்சாரத்தை சேமித்து வைத்து விநியோகிக்க வசதி கிடையாது‘‘ என்றார்.

கடந்த ஆட்சில் சரியான திட்டங்கள் தீட்ட படாததே காரணம்