பால் கொள்முதல் விலை லிட்டருக்கு ரூ.3 உயர்வு

சென்னை:பசு மற்றும் எருமை பால் கொள்முதல் விலை, லிட்டருக்கு, 3 ரூபாய் உயர்த்தப்பட்டுள்ளது. இதனால், தமிழகத்தில், கூட்டுறவு அமைப்பின் கீழ் உள்ள, 22.50 லட்சம் பால் உற்பத்தியாளர்கள் பயன் பெறுவர். அதே நேரத்தில், ஆவினில் விற்கப்படும் பால் விலையில் மாற்றமில்லை எனவும் அரசு அறிவித்துள்ளது.

"தமிழக அரசின், ஆவின் நிறுவனத்திற்கு வழங்கப்படும், பால் கொள்முதல் விலையை, உயர்த்தி தர வேண்டும்' என, பால் உற்பத்தியாளர்கள் நலச் சங்கத்தினர், கோரிக்கை விடுத்தனர். அதை பரிசீலிக்க, முதல்வர் ஜெயலலிதா தலைமையில், நேற்று, தலைமைச் செயலகத்தில், ஆய்வுக் கூட்டம் நடந்தது.அமைச்சர்கள், ஆவின் நிறுவனத் தலைவர், மில்லர், தலைமைச் செயலர், ஷீலா பாலகிருஷ்ணன், ஆவின் நிறுவன மேலாண் இயக்குனர், சுனில் பாலிவால் மற்றும் அதிகாரிகள் கலந்து கொண்டனர்.

உயர்வு:விரிவான விவாதத்திற்கு பிறகு, பசுந்தீவனம் மற்றும் உலர் தீவனம் விலை, பணியாளர்களின் சம்பளம், கறவை மாடுகளின் விலை மற்றும் மருத்துவச் செலவு ஆகியவற்றை கணக்கில் கொண்டும், அண்டை மாநில கூட்டுறவு பால் சங்கங்கள், தனியார் பால் நிறுவனங்கள், பால் விலையையும், பால் கொள்முதல் விலையையும், உயர்த்தி உள்ளதை கருத்தில் கொண்டும், பால் கொள்முதல் விலையை, உயர்த்தி தர, முதல்வர் ஜெயலலிதா உத்தரவிட்டார்.பசும் பால் மற்றும் எருமை பாலுக்கான கொள்முதல் விலையை, லிட்டர் ஒன்றுக்கு, 3 ரூபாயாக, உயர்த்தி வழங்கப்படும். புதிய கொள்முதல் விலை உயர்வு, ஜனவரி, 1ம் தேதியில் இருந்து, அமலுக்கு வரும்.இதைத் தொடர்ந்து, பசும் பால், கொள்முதல் விலை, லிட்டருக்கு, 20 ரூபாயில் இருந்து, 23 ரூபாய்; எருமை பால் கொள்முதல் விலை, லிட்டருக்கு, 28 ரூபாயில் இருந்து 31 ரூபாயாக, உயர்கிறது. தமிழகத்தில், கூட்டுறவு அமைப்பின் கீழ் உள்ள, 22.50 லட்சம் பால் உற்பத்தியாளர்கள் பயன் பெறுவர்; இவர்களுக்கு ஆண்டுக்கு, 273.75 கோடி ரூபாய் கூடுதலாகக் கிடைக்கும். "பால் கொள்முதல் விலை உயர்த்தப்பட்டாலும், நுகர்வோர் நலனை கருத்தில் கொண்டு, பால் விற்பனை விலை உயர்த்தப்படாது' என, முதல்வர் ஜெயலலிதா அறிவித்துள்ளார். இதனால், ஆவினில் பால் விலை, வழக்கம் போல் இருக்கும்.

உற்பத்தியாளர்கள் அதிருப்தி:

சேலத்தில், கடந்த, 15ம் தேதி நடந்த கூட்டத்தில், "பால் விலை உயர்வு தொடர்பாக, சங்க பிரதிநிதிகளை அழைத்து முதல்வர் பேச்சு நடத்த வேண்டும். இல்லையெனில், ஜனவரி, 1ம் தேதி முதல், காலவரையற்ற பால் உற்பத்தி நிறுத்தப் போராட்டத்தில் ஈடுபடுவோம்' என, பால் உற்பத்தியாளர் நலச்சங்கம் அறிவித்தது. இந்நிலையில், பசும் பால், எருமை பால் இரண்டுக்கும், லிட்டருக்கு, மூன்று ரூபாய் வீதம் உயர்த்தி, முதல்வர் ஜெயலலிதா அறிவித்தார். இருப்பினும், பால் விலை உயர்வு திருப்தியளிக்கவில்லை என, உற்பத்தியாளர்கள் கூறியுள்ளனர்.தமிழ்நாடு பால் உற்பத்தியாளர் நலச்சங்க மாநில பொதுச் செயலர், ராஜேந்திரன் கூறியதாவது:பசும் பாலுக்கு, 10 ரூபாயும், எருமை பாலுக்கு, 13 ரூபாயும் உயர்த்தி தர வேண்டும் என, கேட்டோம். ஆனால், மூன்று ரூபாய்மட்டுமே உயர்த்தப்பட்டுள்ளது. இந்த விலை உயர்வு, எங்களுக்கு திருப்தியளிக்கவில்லை.ஆவினிலும் பால் விலை உயர்த்தப்பட்டால் தான், உற்பத்தியாளருக்கு உரிய விலை கிடைக்கும். இல்லையெனில், ஆவின் நஷ்டத்துக்கு தள்ளப்படும். சேலத்தில், டிச., 25ம் தேதி நடக்கும் அவசர செயற்குழுவில், அடுத்த கட்ட நடவடிக்கை குறித்து முடிவெடுப்போம்.இவ்வாறு அவர் கூறினார்.

தமிழகத்தில் உள்ள, 17 ஆவின் ஒன்றியங்களுக்கு, 8,200 பிரதம பால் கூட்டுறவு சங்கம் மூலம், தினமும், 21 லட்சம் லிட்டர் பால் சப்ளை செய்யப்படுகிறது. கோரிக்கைகளை, தமிழ்நாடு பால் உற்பத்தியாளர் நலச்சங்கம், தமிழக அரசிடம் வைத்தது. ஆனால், கோரிக்கை தொடர்பாக, முதல்வரோ, பால்வளத் துறை அதிகாரிகளோ பேச்சு நடத்தவில்லை.

தினமலர்